Vanglaini - Spider-Man Marvel Studios aṭangin chhuak

KHAWTHLIR

Heroin kg. 1.09 man

Mizoram Police-te chuan nimin tlai khan Zokhawthar aṭanga lo kal pick up truck MZ/01 N - 7137 aṭangin Tuikhurhluah heroin kg. 1.09 an man a, motor-a chuang Thangliana (37) s/o Bawiliana, Myanmar leh Zoliansanga (45) s/o Kaithanga, Khuangleng khuate an man. Thudawn danin, Tuikhurhlua police duty-te chuan motor hi lo tihdin an tum a, mahse an tlan tlang lui a; police-te chuan motor hi um zuiin km. 1 hnu velah an umpha a, an man ta a ni.

Centenary lawm

Venghnuai Presbyterian kohhran chuan nimin khan an hall-ah an kum 100 (Centenary) tlin lawmna atan free clinic leh thisen pek runpui an buatsaih. Free clinic-ah hian Venghnuaia doctor-te'n damlote an en a; thisen pek runpuiah hian mipa 18 leh hmeichhe pathum, an vaiin mi 21 in Aizawl Civil Hospital tan thisen unit 21 an pe. Venghnuai kohhran hian June 2 aṭang khan centenary hi an lawm ṭan a, a lawmna pui ber chu November 15, 2019 ah an buatsaih ang.

Inthlan chawlh

Mizoram sorkar chhuan thuchhuah siamin, August 30, 2019-a local council by-election neihna tur Chaltlang, Chhinga Veng leh Kanan Venga sorkar hnathawkte'n vote an thlak theihna atan inthlan ni hi heng veng pathum huam chhunga sorkar hnathawkte tan chawlh a nih thu a tarlang.

DC-in hawng

Siaha DC Bhupesh Chaudhary chuan hmeichhia harsatna tawkte tluk luhna tur, One Stop Centre atana hman lailawk tur DC office quarters pakhat chei ṭhat chu nimin khan a hawng. Siaha DC chuan One Stop Centre chu 24x7 hawn a nih tur thu a sawi.

Zirtirtu training

SCERT chuan nimin khan an auditorium-ah high school zirtirtute tan 'Training of Nodal Teachers on Drug Demand Reduction' an buatsaih a; Aizawl district-a high school zirtirtu 34 an tel. He training hi National Action Plan on Drug Demand Reduction, Ministry of Social Justice and Empowerment leh Ministry of Human Resource Development hmalaknaa neih a ni.

DAWNTISEI

Spider-Man Marvel Studios aṭangin chhuak

Marvel Studios president Kevin Feige chuan Spider-Man movie chu an produce tawh dawn loh thu a sawi.

Sony leh Marvel hi sum insem dan chungchangah an inrem thei lo a, hemi a nih avang hian an thawkdun thei dawn ta lo a ni.

Sony thupuangtu chuan thuchhuah siamin, Marvel company head Disney chu Spider-Man film produce tu ber an nih tawh dawn lo chu pawi a tih thu a sawi.

Kum 2015 khan Marvel Studio leh Sony-te chuan inremna siamin Spider-Man chu Marvel Cinematic Universe (MCU) huangah an lalut a, Sony lam hian a character tur leh sum leh pai lam an buaipui thung a ni.

MCU huanga Peter Parker telve tawh lo tur chu ngaihruat thiam a har a, Marvel fan-te tan chuan thu lawmawm loh tak a ni ngei ang.

Share this Post

Login to comment

No Comments