Fighter of the year-ah Fury

Boxing chanchin ziak ṭhin magazine lar ber pawl Ring magazine chuan kum 2015 chhunga fighter of the year atan British boxer Tyson Fury an thlang.

Kum 27-a upa Fury hian November, 2015 khan Ukrainian boxer Wladimir Klitschko chu IBF, WBA leh WBO heavyweight kawnghren hreng turin a hneh a, fighter of the year-ah thlan a nih phah ta a ni.

Fury chuan, "Ring magazine fighter of the year-a thlan ka ni ta mai hi mak ka ti a, ka inchhuang hle a ni," tiin a lawm hle.

Manchester khaw-chhuak Fury hian Klits-chko a hneh hnuah hian hmeichhe chungchang mawi lo taka a sawi bakah neih inang inkawp leh nau tihtlak chungchang na takin a sawisel a, hei avang hian BBC Sports Personality of the Year shortlist aṭanga paih duhtu an tam hle. Mahse, BBC chuan Fury hi an chawimawina dawng thei zingah an telh tlang tho a, palina dinhmun a hauh pha hram.

American boxer ropui Mike Tyson chuan, "Boxing ka chawlhsan hnua heavyweight cham-pion zinga ṭha ber chu Fury hi a ni. Mipa diktak a ni a, midangin eng angin nge an ngaihah ka buai lo. A duh duh sawi turin zalenna a nei," tiin a lo chhan tawh.

'Iron' Mike Tyson chuan, "Beiseina nei lo leh tlu tawh nia inngai ten Fury-ah hian beiseina an hmu a, inzir nan an hmang a ni," tiin British boxer nun chuan mi tam tak a hneh thu a sawi.