Anfield-ah Arsenal an leng lut dawn

Zanin dar 1:30 hian Premier League hmahruaitu Arsenal chu Liverpool khelmual Anfield-ah an leng lut dawn. League title inchuhna inkhel tur la ni rih lo mah se English football-a hnuhma nei lian club pahnih an nih avangin inkhel ngaihven hlawh a ni.

Gunners manager Arsene Wenger hi Premier League-ah a mikual lo hle a, tuna manager awm laiah chuan club ngai enkawl rei thei ber a ni mek. Liverpool manager Jurgen Klopp erawhin English football-ah tawnhriat a la ngah lo. Mahse, Klopp hian German-ah manager ṭha a nih zia a pholang tawh a, Borussia Dortmund chu Bundesliga title a chawi pui tawh bakah kum 2012-13 khan Champions League final a lo thlen pui tawh bawk.

Manager pahnihte hi tun hmain vawi nga an lo inhma-chhawn tawh a, Wenger hian vawi thum hnehna changin Klopp hian vawi khat hnehna a chang thung. EPL-ah erawh an vawi khat intawnna tur a ni a, tlawm zawk nih an tum lo ang.

Team pahnihte hi August thla khan Emirates Stadium-ah goal lut loin an lo inhnehtawk tawh. Tun hnaiah Liverpool hian Arsenal lakah result ṭha an hlawh chhuak khat hle. An intawn hnuhnung vawi 10-ah Redes hian vawi khat chiah chakni hmel an hmu a, kum 2014 February thla khan Reds hian zanina an inkhelhna tur an khelmual Anfield-ah hian 5-1 in Gunners hi an lo sawp tawh a ni.

Dinhmun inang lo

Liverpool hian Brendan Rodgers kaihhruaina hnuaiah season bul an ṭan fuh loh avangin Dortmund manager hlui Klopp an la lut a, ani hnuaiah pawh hian beisei angin hma an sawn chak lo. League match 20 khelh tawh aṭanga point 30 hmuin table-ah pariatna dinhmun an luah mek.

Kar hmasa Zirtawpni zan khan Liverpool hian FA Cup third round-ah League Two club Exeter City chu 2-2 in an inhnehtawk pui a, an league match hnuhnung berah January 2 khan West Ham lakah 2-0 a an tlawm bawk avangin season tharah Champions League khelh an tum a nih chuan zaninah hian chak loh a thiang tawh lo ang.

North London club hian season ṭan dawnah keeper Petr Cech chauh la lut mah se beisei phak bakin season an hmang ṭha mek a, point 42 hmu tawhin hmahruaitu an ni mek. Kum 2003-04 hnua a vawi khat nana league title la turin beiseina an neih san vanglai tak a ni thung a, FA Cup-ah pawh Sunderland hnehin fourth round an inhlangkai tawh bawk.

Hliam leh dam

Liverpool hian an player pawimawh pathum Martin Skrtel, Dejan Lovren leh Philippe Coutinho te chu malpui na vang vekin an la chhawr thei dawn lo a, centre-back pahnih Kolo Toure leh Mamadou Sakho te erawh an inlan theih tawh beisei a ni. Team captain Jordan Henderson, Jordon Ibe leh James Milner te pawh mamawh chuan chhawr theih an ni ang.

Arsenal midfielder Tomas Rosicky khup na a dam tawh a, Liverpool a hmachawn theih rin a ni. Ani bakah hian Mesut Ozil leh Mathieu Flamini te an dam bawk avangin Wenger tan midfield-ah buaina a awm lo tura ngaih a ni. Amaherawhchu, Danny Welbeck, Jack Wil-shere, Francis Coquelin leh Santi Cazorla te chu hliam vangin khelmual chhunga lut turin an la dam lo.

Wenger-a'n Klopp a dah sang

French manager Wenger chuan an khingpui tur Reds manager chungchang sawiin, "Klopp hian a naute khelh tir dan phung mumal tak a nei a, chu chu Bundesliga-ah pawh a lo hlawhtlin pui tawh. Premier League-ah club lian lakah hnehna a rawn chang leh tawh a, zaninah pawh hian kan fimkhur a ngai dawn. Khelh dan phung nghet nei ve ve kan nih avangin kan ngaihdanin kan kal leh ngei dawn a, hlawhtlin ngei tumin kan inbei dawn a ni," a ti.

Klopp a inringtawk

Liverpool manager Jurgen Klopp chuan Arsenal chu hneh theih a inrin thu sawiin, "Arsenal leh Arsene hian khelh dan phung an nei a, an khelh dana kan khelh ve ngawt a nih chuan kan tan chak ngaihna a awm lo ang. A bik takin counter-attack-ah an hlauhawm tih ka hria, chumi dang tur chuan kan inbuatsaih ang. Player inhliam an neih avangin an ṭhat lai ber a ni lo mai thei, mahse league hmahruaitu an nih avangin team ṭha an ni tih a chiang. Team
ṭha hneh turin kan ṭha ve tawk a, Arsenal hi hneh theih an ni tih kan lan tir ang," tiin a sawi.

Klopp-a enkawlna hnuaiah Liverpool hian Gunners elpui Leices-ter City leh Manchester City chu league-ah an lo hneh tawh a ni.