Khiangte Construction Ṭhazual GOSPEL No. 1-ah Seraphic Choir ‘Lalpa a rinawm’

Hun eng emaw chen chart lo luahlum tawhtu, Seraphic Choir chuan 'Lalpa a rinawm' tih chu Khiangte Construction Ṭhazual Gospel chart thar berah no. 1 an rawn nihpui ta.

Seraphic Choir hi kum 2016, July 25-a din niin tuna choir member-te chu - Lalchhandama, Director, Venghnuai; H.C Lalhlimawmi Venghnuai, Ngurthansanga Kawlni Venghnuai, Ngursangzuali Salem Veng, Ngurnuntluanga Kulikawn West, Lalngaihzuala Fanai Khatla South leh Lalremruati Bungkawn Vengthar-te an ni. Video album, Upa F. Vanlalchhuanga hlate Vol 1 an siam tawh a, Volume 2-a tur an buatsaih leh mek. Zonet Ṭhazual Award leh MDM Award-te pawh an dawng tawh bawk. An zaithiamin an zai nung a, zaia rawngbawlna lamah pawh sawm an hlawh hle.

Chart-a no. 1 an nihpui, 'Lalpa a rinawm' hi Jeff & Sheri Easter te hla niin, choir member zinga mi Ngurnuntluanga'n Mizo hlaa sak turin a dah chhuak a ni. Music video hi July 16 khan tichhuakin, music & records hi Seraphic Records-ah an ti a, audio mixing hi ZTA Khawlhring kutchhuak niin RDS Shots chuan video hi a siamsak thung.

Lalthansangi pawhin hma sawn zelin 'Zion Lal thu' tih chu pahnihnaah a rawn nihpui a, Nancy Zothanmawii 'Thlarau thianghlim min chenchilhtu' tih chu pathumnaah a awm bawk. Nghaktea Fanai leh Rebecca Zorintluangi-te pawhin an dinhmun an rawn siam ṭha zel a, Top 5-ah rawn lang dun ve ta bawk.

Ṭhazual Top 10-ah Dr Zoa, Marshall Fka ft Moria run te an la awm chhunzawm a, anni bakah mi pathum - Sailo Lalsangzuali, Lalhlumawii leh Maruati-te an rawn lang thar bawk a ni.