Assam-in common prayer hall siam dawn

Congress party hruaitu hlun, Assam Chief Minister Tarun Gogoi chuan sakhaw hrang hrangte hman theih turin an state chhunga common prayer hall an din dawn tih a sawi.

Tarun Gogoi chuan sakhaw hrang hrangte inkara inpumkhatna ṭha a awm theihna turin common prayer hall hi an siam dawn tih a sawi a, a tirah chuan khawpui lian, Guwahati leh Silchar-ahte din a ni phawt ang a, district headquarters tinah din chhunzawm a ni ang, a ti.

Assam hi assembly inthlan hmabak a ni a , hei vang hian sorkar pawhin kawng hrang hrangin ṭan a la mek a ni, mipuite hamṭhatna tur scheme hrang hrang pawh a duang thar a ni. Gogoi chuan, "Sakhua leh hnam hrang hrangte inkara inpawhna ṭha awm hi hmasawnna atana thil pawimawh tak a ni" a ti.

Gogoi chuan an state chhunga helpawl hrang hrangte chu sorkar nena inremna siam tura inbiakna dawhkan kil turin a sawm bawk. Assam state dinhmun chuan ralmuan lam a pan zel a, hmasawnna kawng hrang hrang pawh a thleng mek a ni tiin, hemi rual hian hmabak tih tur tam tak an la neihthu a sawi. Helpawlte chu kawng dik zawha, remna leh muanna leh hmasawnna chak zawka an neih theihna tura sorkar an thiltih ṭha lo te bansan turin a sawm.