Vanglaini - Mizo Series 0389-ah 'Lam ang letin' a fuh

KHAWTHLIR

Taxi service dawn lo

Aizawl Two Wheelers Taxi Association (ATTA) chuan vawiin hian nilengin Chawlhhmun YMA hall-ah 'Chhung inkhawm' an nei dawn a, vawiin hian 2 wheelers taxi service a awm dawn lo a, mipui hriatthiamna an ngen.

Thisen pe

Bethlehem Venglai Branch KṬP chuan Inrinni khan an Kohhran Hall-ah blood donation camp an huaihawt a, Synod Hospital tan thisen unit 49 an pe a, a petute mipa 44 leh hmechhia panga an ni.

Candidate puang

August 30, 2019-a Chaltlanga local council by-election neih tura ZPM candidate tur chu R Lalsangpuii a nih thu, Inrinni khan bialtu MLA Vanlalhlana'n Chaltlang Dawrkawna vantlang inkhawmah a puang. Candidate puan inkhawmah hian ZPM president Lalliansawta leh Aizawl South-II bialtu MLA Lalchhuanthanga te pawhin thu an sawi a ni.

Damdawi man

Central YMA SRS hnuaia Pharmaceutical Abuse Drugs Squad (PADS) chuan August 10, Inrinni khan khan Dawng Dawng Pharmacy, Lower Zarkawt aṭangin Tramadol mûm 13,770 an man a, damdawite chu Mizoram sorkara drugs controller hnenah an hlan.

Free clinic

Aizawla Kanan Veng Branch KṬP chuan August 10, Inrinni khan Tuipuibari-ah a thlawna inentirna (free clinic) an buatsaih a, an branch-a doctor-te'n mi 300 chuangte hriselna dinhmun an enfiah.Tuipuibari-a Synod Mission Board thawktute chuan, an rawngbawlna hmun hmuhpui a, mipui mamawh tak inentirna buatsaihsak an ni chu an lawm tak zet thu an sawi.

Sorkarah lawm

Ngopa RD Block

chhunga Joint Students Union chuan thuchhuah siamin, Saitual district-a awm an duhnate hriaa Ngopa leh a chhehvela khuate Mizoram sorkarin Saitual district-a awm tura a ti chu lawmawm an tih thu an tarlang. Hliappui Area Joint Village Council pawhin an khua leh a chhehvelte Saitual district-a dah an nih avanga an lawmthu an tarlang bawk.

DAWNTISEI

Mizo Series 0389-ah 'Lam ang letin' a fuh

Zonet-ah Zirtawpni zan apiangin Mizo Series 0389 an tichhuak a, entu lam beisei la pha lo mah se episode 3-a Zara (Vanlaltlansaa) hla sak 'Lam ang letin' tih chuan ngaihthlak a hlawh. Episode tawp lamah August 16-a chhuak tur episode 4 'Vanglaini' thlir lawkna a awm a, episode awm tawh pathum aiin en a châkawm.

Lam ang letin

December 4, 2016 khan Mizo band Casey's Secrets chuan YouTube-ah an guitarist Asanga phuah 'Lam ang letin' tih chu an dah chhuak a, he hla hi episode 3 'Mitmei' innghahna a ni.

Episode 3-ah hian Zara talent pholan a ni a, music video 'Lam ang letin' an siam dan ni berin a tawpah Zara, Ashley (Christina Pautu), Pa Mawia leh Zaia-ten an en ho. An chan dan dah ṭhain hla bik han thlir zui ila, Zonet chuan YouTube lamah '0389: VANLALTLANSAA - LAM ANG LETIN' tih hming vuahin August 10, Inrinni khan an dah chhuak. Nimin tlai thleng kha chuan entu 34,000 an awm tawh a, O389 series-a an sak a nih avangin en a hlawh a tih theih.

A fuh chho dawn

YouTube-a comment-tu pakhat Lalawmpuia Fanai chuan, "A chhuak tawh chin chu la hmuhnawm lo ve khawp mai," tiin 0389 hi a sawisel a, he ngaihdan thlawptu an awm ṭeuh a rinawm rualin a zuna uai pawh an awm ṭan.

Producer leh director Raymond Colney chuan, "Zara hian Ashley a phu hlawl lo, a ti hmuhnawm lo vek te an ti. Mahse keini chu kan tumah a hlawhtling. Hei hian chhan a nei a, nghah peih hret a ngai a ni. Mipui kan tibo rei hret ang tih erawh kan hlau rum rum a, mah se a hmuhnawm lai kan la thleng lo tih hi ka sawi theih chu a ni," tiin Vanglaini a hrilh.

0389 en tinuamtu Ashley (Christina) chuan, "Keini chuan plot kan chhiar sa a, thil thlen dan tur kan man thiam. A changtu zingah pawh hian en phawt loh chuan man fuh zan lo an awm ang. A bik takin episode thumna thleng chuan hriatthiam a har deuh a ni," tiin episode hmuhnawm zawk a awm thu Vanglaini a hrilh ve bawk.

YouTube lama comment-tu pakhat Isaac Vechhia chuan, "Mizo movie/tv series-ah chuan 0389 cast hi a fuh ber ang," tiin a lo ziak ve bawk a, 0389 zuna uai an awm tih phat rual a ni lo.

Share this Post

Login to comment

No Comments