Miss Colombia a ṭawng chhuak

Miss Universe a nih thu an puan hnu a, lallukhum pawh khumtir a nih hnua a nih loh thu an puan leh tak Miss Colombia Ariadna Gutierrez chuan a chunga thil thleng chu hrehawm a tih tak zet thu a sawi.

Hun engemawchen a thil tawn chung-chang a sawi chhuah loh hnuah Ariadna Gutierrez hi tun hnai khan ṭawng chhuakin, "Ka tan chuan kha hun khan a hrehawmin, inhmusitna ang hiala ngaih theih a ni. Ka tan chauh pawh a ni lo, Colombia mipui tan chauh pawh a ni lo, auditorium-a awmte tan khan a hrehawm tak zet ang," a ti.

Miss Universe atana thlan tak Miss Philippines, Pia Alonzo Wurtzbach chungchang sawiin Ariadna Gutierrez, "Hmeichhe mak danglam tak a ni. Kan experience avangin dam chhungin kan inngaina tawh ang," tiin, kar thum hun an hman dun chhungin, Pia Alonzo Wurtzbach chu a pawn lam mawina mai ni loin, a rilru chhung ril mawina chu entawntlak a tih thu a sawi.

Miss Colombia chuan Pia Alonzo Wurtzbach lawmpui thu sawiin, "Ropuina nen i ram ai i awh a, mi zawng zawng hi nangmah avangin an hlimin an lawm ngei ang tih ka hring. I dinhmun ka hmuh hian ka hlim a ni," a ti. Dinhmun zahthlak takah ding mah se, a ṭhiannu a lawmpuina erawh a chuai chuang lo a nih hmel.