Mizo Hit Chart-ah Youngfella x Zaii Hauchhum langsar; Gospel-ah Jonathan Lianhna in hma hruai leh

Zo Event Management leh streaming app, Runmawi-te'n YouTube-a Mizo hla view ngah zual an thlan chhuah, Mizo Hit Chart-August chu nizan khan puan a ni a, Youngfella leh Zaii Hauchhum-te bawk an langsar leh.

Mizo Hit Chart hian pawl bik thliar loin, YouTube-a Mizo hla upload-te a huam vek a, August chart hian June 1 aṭanga August 1 chhunga YouTube-a Mizo hla dahte a huam a ni.

Gospel lamah chart hmasaa view ngah ber, Jonathan Lianhna bawkin a hla dang 'Nun ṭobul' tih hmangin hma a hruai leh a, Zorema Khiangte chuan July thla tawp lama a hla dah thar, 'Ka lawmna ber' tih chu pahnihna a rawn nihpui thei nghal bawk. Nancy Zothanmawii 'Hmana kan nunhlui' tih chu pathumnaah awmin, Thawhlehnaniropui leh One in Christ-te chu gospel hla view ngah zual Top 5-ah an lang bawk.

Lengzem lamah Youngfella leh Zaii Hauchhum-te bawk an langsar leh a, an thawh dunna 'Val Senior' chu June-August, 2023 chhunga YouTube-a view-tu ngah ber niin, thla thum chhung hian view mtd 4.39 zet an nei thei. Youngfella leh Smiley thawh dunna pawh no. 4-ah awmin, Zaii Haichhum hian a single 'Bawihtuai' tih chu no. 8-ah a lanpui thei bawk.

Naupang chena kan hriat lar, Saiwanah Sailo 'Ka pa Khuma' chu no. 2-ah a awm a, chart-ah a la cham rei hle pawh a rinawm. JNY, Richie Fanai, Eddie boy, Lesky Hupe, Guru Gee, Lil Kiki-te chu no. 3-ah awmin, Evenflow chuan an hla nalh tak mai, 'A.n.A' hmangin Top 5 an khar.