Billboard 200: Zach Bryan-a'n Travis Scott a paih thla

Billboard 200 Album chart tharah thla khat chhung roreltu, Travis Scott (KIK) chu country music star Zach Bryan chuan a rawn paih thla thei ta.

Zach Bryan hian a hming chawina album, 'Zach Bryan' chu album chart-ah no. 1 a neih ṭum khatna niin, kar liam ta khan equivalent album unit 200,000 a nei a, he album-a a hla 16-te chuan stream mtd 233.09 an nei bawk. Country rock album zingah tihchhuah kara stream nei ngah pangana a ni a, rock album zingah kum khat chuang hnua Billboard 200-a no. 1 ni thei hmasa ber a ni bawk.

Hun rei tak no. 1 dinhmun lo luah tawh, Travis Scott 'Utopia' chuan kar li hnuah pawh equivalent album unit 91,000 la neiin no. 2-ah a awm. Morgan Wallen 'One Thing at a Time' pawhin a la tla hniam tak tak thei lo a, March thla tira a tihchhuah daih tawh hi no. 3-ah la awmin equivalent album unit 83,00 a la nei pha. Top 5-ah hian Taylor Swift 'Midnights' leh SZA 'SOS' te an la lang.

Barbie sountrack pawh no. 4 aṭangin 6-ah a tla thla a, hetih lai hian Peso Pluma 'Genenis' chu no. 9 aṭangin no. 7-ah a rawn chho thung. Chart luahtumtu pahnih, Taylor Swift leh Morgan Wallen-te album dang pawh Top 10-ah hian an lang chhunzawm zel bawk.