Lersia Play August Top Chart: ‘Thaibawih’ film an hralh hnem ber

Mizo film streaming app, Lersia Play chuan August thla chhunga Mizo film an hralh chhuah hnemte an tichhuak leh a, 'Thaibawih' chu August thlaa film hralh hnem ber a ni.

Zote Entertainment buatsaih, 'Thaibawih' (Hmeichhe lu chu mipa) tih hi August 11 zan khan tlangzarh niin, hemi zan aṭang hian Lersia Play-ah en theih tura chhawpchhuah nghal a ni bawk. He film-ah hian Ruthy Chenkual leh 'Thinglung khawngaihthlak' singer, Francis-te an chang a, 'Lerlawri' bakah Aaron Malsawmdawngzuala leh Malsawmtluangi Tochhawng-te pawh an inlan bawk. Director hi Mike niin, Lersia Play chu co-producer a ni.

August thla chhunga film hralh chhuah hnem pahnihna hi film thar bawk, 'Kaphranga Fatlum Awitea -The Ghost Hunter' a ni. The Ghost Hunter hi thla tawp lam, August 25-a tihchhuah chauh ni mah se hralh chhuah tam lamah pahnihna a rawn hauh pha tho a ni. Horror-comedy niin, Johan Lalhmunmawia (JC Motion Pictures) siam a ni. He film-ah hian Esther Hadasi Ralte, Elvis Ngurchungnunga leh Lalrozuala Chhangte an chang a, anni bakah Mastea, Rspi leh K. Vanlalawmpuia (Zabilha) te an inlan bawk.

In-House Production kutchhuak, Papuia Pachuau channa, 'Pa Hausa' chu August thlaah pawh film hralh chhuah hnem pathumnaah a tla thla. June leh July thlaah 'Pa Hausa' hi hralh chhuah hnem ber a lo ni tawh a ni. Rspi leh Isak Chhangte channa, 'Mo Kawr' pawh July thlaa pahnihna aṭangin August thlaa palinaah a tla thla ve ta bawk. 'Mimi' film chu chart hmasaa parukna aṭangin, August chart-ah panganaah a rawn chho ve thung.

August thlaa Lersia Play aṭanga film hralh chhuah hnem 10 zingah Tawki, Brother Zova, Archangkawm, Vawmva leh Nukawki Pasal tihte an la lang bawk.

Lersia Play hian tun thla chhung hian Mizo film thar eng emaw zat an rawn chhawp chhuak leh dawn a ni.