Lengkhawm zai intihsiak: A zawna pakhatna ni thei Republic Veng Branch YMA

CYMA leh PHE Depart-ment ṭangkawpin August 18 - 25, 2023 chhunga ram pum huap lengkhawm zai intihsiak a buatsaihah Republic Veng Branch, Aizawl chu pakhatna an ni. Rawpuichhip Branch chu pahnihna niin, Chawnpui Branch chu pathumna an ni.

Kum 2019-a CYMA in lengkhawm zai intihsiak a buatsaihah khan Republic Veng Branch hi pakhatna an lo ni tawh bawk a, lengkhawm zai intihsiakah a zawnin pakhatna an ni thei.

Lengkhawm zai intihsiakah hian mimal lawmman siam a ni bawk. Ramengpuii, Ngentiang Branch chu hla hril thiam berah thlan a ni a, khuangpu ṭha berah Chawnpui Branch khuangpute pahnih, Lalsangluaia leh Robert C. Lalhmangaiha te thlan an ni.

August 18 zan aṭangin intihsiakna hi neih ṭan a ni a, YMA branch 48 telin a tam ber chu Aizawl khawchhung branch an ni. Branch tinte hian hla thlan chhuah 10 angin hla pathum an thlang a, heta tang hian hla chuam pakhat zel an nei.

August 23 zanah Top 10 puan a ni a, August 25 zanah Top 10-te hi Central YMA Hall, Tuikhuahtlangah intihsiak lehin, result an puang nghal. Endiktute hi Lalromawia Saron Veng, B. Bawlkhuma Tlangnuam leh Vanlalsiama Saron Veng te an ni.

Lawmman pakhatna dawngtu, Republic Branch hian August 18 zanah an hla chuam atana an thlan, Saihnuna phuah 'Pathian ralthuam hmangtute chu', leh Upa P. Saitawna phuah 'Awmkhua a har tlang ka chuan' tih an sa a, Top 10 intihsiaknaah Patea phuah, 'Hmanah Mosian Kanan a thlir' tih an sa. Pakhatna hian Rs 1,00,000 leh thuziak an dawng.

Rawpuichhip Branch hian pahnihna lawmman Rs 70,000 leh thuziak, pathumna Chawnpui Branch-in Rs 50,000 leh thuziak an dawng a, intihsiaknaa tel branch zawng zawng hnenah consolation prize pek an ni bawk.