Vai pawl kan zawm ve dawn lo - Lalduhoma

ZPM leader Lalduhoma chuan, ZPM party chu political party pahnihin an do rawn mek thu leh, tualṭo party an ni a, vai páwl an zawm ve dawn loh thu a sawi.

Lalduhoma hian August 19, Inrinni khan ZPM Aizawl West-I Block-II ten Sairang YMA Hall-a mi thar lawm luhna inkhawm an buatsaihah thu sawiin, "Tunlai hian party pahnihte'n min do rawn mek a, hei hian dinhmun ṭha takah kan ding a ni tih a tilang chiang hle. Party dang hian kan kal sual an hlau hle a, min véng char char tihna a ni. Kan kal sual hlek nia an hriat chuan nasa takin min sawisel ṭhin a, a lawmawm kan ti hle. Sorkar tharah pawh opposition ṭha tak an nih kan ring," a ti.

ZPM chu tualṭo party a nih thu sawiin Duhoma chuan, "Tu'ma bâwihah kan lut dawn lo, vai pawl kan zawm ve dawn lo, kan ram kan hnam kan sakhua tan kan ding zel dawn. ZPM hian kan political goal chu Zo fate zawng zawng rorelna pakhat hnuaia awm a la ni reng a, engtikah mah kan thlauh thla dawn lo," a ti a; Mizo hnam a insingsa mek tih a sawi.

Lalduhoma chuan, ZPM candidate turte'n hma an la nasa nia sawiin, "Hah pawh an hah. Eiru lo tura intiam ngam candidate kan nei ringawt pawh hi a thlamuanthlak a ni. Vote kan thlâkin tu nge chief minister tur tih hre reng chungin vote kan thlak tur a ni a, kan bial chauh thlir loin, ram pum thlir zel turin kan inchah a ni," a ti.

ZPM Leader chuan, an party chu chapo lo tura an infuih ṭhin thu sawiin, "Tun hnaia inthlan kan hmachhawn ṭhenkhatah Pathian leh mipui zarah hmasawnna kan hmu ve zel a, keini chuan mi dang deusawh nan leh chapopuina atan kan hmang ve ngai lo," a ti a, Pathian hnenah lawmthu an sawi thu a sawi.

Inkhawmah hian ZPM candidate tura ruat TBC Lalvenchhunga (Aizawl West-I), Lalnghinglova Hmar (Aizawl West-II) leh Baryl Vanneihsangi (Aizawl South-III) ten thu an sawi bawk.

ZPM thuchhuah chuan, lawm luhnaah hian Lalduhoma'n ZPM zawm thar mi 490 a lawm lut niin a tarlang.