Kristian Ṭhalai Pawl Mobile Application tlangzarh

Central KṬP leh Lailen Consulting Pvt. Ltd. ṭangkawpin an siam, Kristian Ṭhalai Pawl Mobile Application chu nimin khan Central KṬP Leader, Rev Dr. F. Pachhunga’n a tlangzarh. Tlangzarh inkhawm hi Lailen Consulting Pvt. Ltd. Office-ah neih a ni. Rev. Dr. F. Pachhunga chuan, “Central KṬP lam kaihhnawih thil hi hmun tin aṭangin zawhna kan dawng ve ṭhin a, a chhanna tam tak he app. hian a pe nghal dawn a ni” a ti.

He Application hi Lailen Consulting Pvt. Ltd. in a thlawnin KTP tan a siam a ni. Lawmsangzuala, Project Manager, Lailen Consulting Pvt. Ltd. chuan he application hi rawngbawlnaa an tih ve theih nia ngaiin, Lailen chuan lawm taka an siam thu a sawi.

He Application-ah hian KṬP News, Lehkha chhuah, Events, Bial leh branch tinte statistics, Central KṬP hruaitu, Synod Choir member te leh Central KṬP Calendar te a en theih. Social Media links hrang hrang dah a ni bawk. Google Playstore and Appstore-ah te a thlawna download mai theih a ni.