Darbu-ah Kimkima 'Kan duh Kan hre lo!' a la chungnung: Play hlawh Top 10-ah Young Muzik hla 8 a lang

Darbu Music App chuan July thla chhunga hla hralh ṭha Top 5 leh hla play hlawh Top 10 a tichhuak leh ta.

Hla lei theiha tihchhuahna, Darbu Exclusive-ah June thlaa hralh chhuah tam ber, Kimkima 'Kan Duh Kan Hre lo!' bawk chu July thlaa hralh chhuah hnem ber a ni leh. No. 2-ah hian famta, Joseph Zaihmingthanga hla 'Tu Nge Maw ka Nih Le' a rawn lang bawk.

The Leprosy Mission Choir-in an hlate kohhran zaipawl leh zaipawl dangte'n an lo sak a, an lo hman ve theih nana Darbu kaltlanga music track an zawrh chhuah chuan mite hlut a hlawh hle a, hralh hnem pathumna a rawn ni. David Darlong 'Ka Damchhan' leh, Aengi & Rosalyn 'Rinawm Min Tiam Kha' tihte chu Top 5-ah an lang bawk a ni.

July thla hian Exclusive release langsar tak a awm lem lo a, hla leitu pawh June thla aiin an tla hniam deuh niin Darbu Team lam chuan an sawi.

July thlaa Darbu App chhunga hla play hlawh ber chu Aengi & Rosalyn 'Rinawm Min Tiam Kha' bawk a ni leh. Hla play tam lamah hian thil mak tak a thleng a, Top 10-ah US lam artist, Yellow Muzik hla pariat ngawt an lang. Heng hlate hi a album 'Peace' ami an ni. US-a zin thla Mizo artist-te zarah Yellow Muzik hian Darbu hi hmelhriatin, a album hi Darbu Library-ah a dah a, hla 11 awmin ram hrang hrang aṭangin hluttu a ngah hle. Artist thawhpui eng emaw zat neiin, an zingah Benjamin Sum, Shin Bia, Elena HT Par leh Ruby Par-te pawh an tel. Youngfella ft. Smiley 'Thiamthu' chu July chhunga hla play hlawh 9-naah a la lang bawk.

Darbu App hian feature thar tam tak tihchhuah tumin hma a la mek a, Mizorama artist ṭha ber berte zingah pawh he app kaltlanga hla thar release tum an awm nual a ni.