Lersia Play Top Chart: July-a film hralh chhuah tam ber 'Pa Hausa' bawk

Mizo streaming app, Lersia Play aṭanga July thla chhunga Mizo film hralh chhuah tam ber chu 'Pa Hausa' bawk a ni leh.

In-House Production kutchhuak, Papuia Pachuau channa, 'Pa Hausa' hi June thla khan Lersia Play aṭanga film hralh chhuah tam ber a lo ni tawh bawk a ni. He film-ah hian Papuia bakah Sangsangi, Joe Pachuau leh Sangpuia te an chang a, director hi Drew Pachuau niin, script writer Samuel L. Pachuau a ni a, Kristie Avon chu co-producer a ni.

Chart tharah hian Rosangpuii Ralte (Rspi) leh Isak Chhangte channa, 'Mo Kawr' pawh a dinhmun ngaiah la dingin, July thlaa film hralh chhuah tam ber dawttu a ni. 'Mo Kawr' hi Lalbiakvela direct a ni a, script writer a ni bawk.

July 7-a mipuite en theih tura chhawp chhuah, action comedy 'Lerlawri ' channa 'Vawmva' chu pathumnaah a rawn lang thar. Director hi Chuauthanpuia Pachuau (Chta) a ni. He film hi Kawrthah bakah Tripura leh Assam-ahte chan a ni.

Nikum November thlaa tihchhuah daih tawh, In-House Production kutchhuak bawk, 'Brother Zova' chu July thlaa film hralh chhuah tam palinaah a rawn invawrh chhuak leh. He film hi Lailen Consulting Pvt. Limited nena an produce a ni a, model chhe lo tak Kimkimi leh rapper G'nie te an chang.

Chart hmasa lama pathumna hauhtu, fiamthu thianghlim hmanga Mizo mipuite tihhlimtu, Mastea film, 'Archangkawm' chu panganaah a tla thla ve ta thung.

Top 10-a hian Mimi, Pine Hill, Nukawki Pasal, Tawki leh Bahhnukte-te an awm bawk a ni.