Mizo film thar pahnih en tur a awm e; Tun karah Mizo film thar pahnih tlangzarh a ni a, mipuite en turin streaming app lamah an rawn chhawp chhuak e.

DÂMPUI FOREST

Adventure horror film, 'Dampui Forest' chu July 27 zan khan Vanapa Hall-ah MLA Lalrindika Ralte chuan a tlangzarh. Mipui ngaihven a hlawh a, release zana ticket siam pawh hi ni hnih chhungin hralh zawh vek a ni. Hemi zan aṭang hian Runmawi Apps-ah en theih tura dah chhuah nghal a ni bawk.

Dampui Forest hi Sports & youth services Department-in Adventure Sport tih theihna tur hmun leh nature tourism tihhmasawnna lam hawi hmun(place) zawng tura adventure team a tirhna film a ni. Ngentiang khaw ram chhunga Dampui ngaw an zir chiang a ni.

He film-ah hian Youtube-a Adventure leh Bushcraft lam min hmuhtir ṭhintu Zira PC, parody music video enhlawh tak siam ṭhin Elza TV, Comedian Search finalist Pachuau Lalenkawla, Zonet-in Mizo Girls Group intihsiak a buatsaiha finalist Lalnunhlui te an chang. Anni bakah hmeichhe solo camper, Love of adventure youtube channel neitu Apuii Bualte pawh a tel a, main role hi Emily-i'n a play a, Kenny Lianhna pawh kan hmu bawk.

Film director hi kum 2017-a chhuak, 'Detective Mart' siamtu Lalruatfela niin, Ṭhatea Ralte Videography chu director of photography a ni a, Mart Visual Inc. produce a ni.

Runmawi Apps-ah Dampui Forest hi Rs. 200/- in lei theih a ni.

TAWKI

Fadyo Pictures Production kutchhuak, action-tragedy-thriller 'Tawki' chu zanin dar 8 hian Lersia Play-ah mipuite en theih tura chhawp chhuah a ni dawn.

Mizo film lama sulhnu nei lian tak, C. Hmingthangvunga siam, 'Tawki'-ah hian a changtu ber chu "Zuali te Unau" tiha changtu, Florence Vanlalhriatzuali a ni. Pafaa zin, pa ber boral thut avanga unaua vakvai chho, a nau ṭawng thei lo nen harsatna tam tak an paltlang hnua Tawki phuba lakna a ni.

Mizo film danga kan la hmuh tam loh, a changtu ber hmeichhia, chutah phuba la tura action role nena pui taka a chetna a ni. Karate lama national level thlenga medal lo la tawh, Florence-i hi acting skill lamah pawh a duai lo hle.

'Tawki' hi Lersia play-ah en theih a ni dawn a, a man hi Rs. 300, Rs. 250, Rs. 200 leh Rs. 150 plus 18% GST a ni ang.