'The Eras Tour' UK leh European leg-ah Paramore

Pop-rock band, Paramore chu Taylor Swift 'The Eras Tour' neih mekah vawi khat an inlan tawh a, nakkuma UK leh European leg-ah erawh an tel kim vek dawn.

Taylor Swift hian nakkum May - August chhung hian UK leh European Eras tour hi a nei dawn a, concert hi vawi 50 dawn a nei ang. Hengah hian Hayley Williams kaihhruai, Paramore hi supporting artist angin an tel vek dawn a ni. Swift chuan Nilaini khan The Eras Tour-ah show 14 an belh thu leh, ram hrang hrangah Paramore nen show an neih tur thu a puang a, Hayley nen hian Nashville-ah tleirawlte an nih lai aṭanga inṭhianṭha tak an nih thu a sawi bawk.

Paramore hian February thla khan 'This Is Why' tichhuakin an hlawhtlinpui hle. He album hi Billboard Top Alternative, Top Rock leh Top Album Sales-ah no. 1 an nihpui.