Mizo Hit Chart-June ah Youngfella bawk a langsar leh

Mizo streaming App, 'Runmawi' leh Zo Event Management ṭangkawpin pawl bik thliar loa Mizo zaithiamte tana thla tina a buatsaih, Mizo Hit Chart-June chu nizan khan puan chhuah a ni. June chart hian thla thum, March-June thla chhunga Youtube-a Mizo hla upload-te a huam.

June chart-ah hian Lengzem lamah Youngfella bawk a langsar fal leh. Mizo hla view-tu ngah zual 10 zingah a hla pali a lang pha. Lengzem hla bika thla thum chhunga view-tu ngah ber chu Youngfella x Smiley 'Hmangaihna dik lo' niin, pahnihnaah pawh Youngfella telna bawk, Rebecca nena an thawh dunna 'Hriat ka duh' a awm a, Saiwanah Sailo 'Run nuam' chu view-tu ngah pathumna a ni.

Gosptel lamah Hlimhlimi a che ṭha a, pakhatna leh pathumnaah a lang. Gospel lamah thla thum chhunga view-tu ngah ber chu Hlimhlimi & Betsy 'Thisen vangin' a ni a, pahnihnaah Jonathan Lianhna 'Aw Isu' awmin, Hlimhlimi 'Vante khian' top 3 a rawn khar.

Gospel hlate hian ngaithlatu/view-tu ngah lamah lengzem lam an la thlau hle. Gospel chart-a pakhatna hian view-tu ngah lamah Lengzem-a 10-na pawh a pha lo hle a ni.