Superman: Legacy-ah David Corenswet leh Rachel Brosnahan

Superman film thar, 'Superman: Legacy' siam turah Clark Kent leh Lois Lane lem chang tura hming hrang hrang sawi rik a nih hnuah, director James Gunn chuan a changtu turte a thlang fel ta.

Superhero franchise aṭangin nikum khan Henry Cavill chu ban a nih tak avangin, Superman thar tur hi hun eng emaw chen an zawng tawh a ni. Full costume leh make-up hmanga screen test neih hnuah, Superman atan David Corenswet leh Lois Lane lema chang turin Rachel Brosnahan-te thlan an ni ta a ni. 'Superman:Legacy' hi kum 2025 nipuia tihchhuah tur a ni.

Big screen-ah Superman-ah hian mi pathum, Christopher Reeve, Brandon Routh leh Henry Cavill-te chauh an la chang. A palina tur, Corenswet hi kum 29 mi niin 2022 thriller, Pearl, Netflix series,The Politician leh miniseries, We Own This City-ah a chang tawh a, tun hi studio film-a leading role a chelh ṭum khatna tur a ni ang.

Kum 32 mi, Rachel Brosnahan hi Netflix show 'House of Cards' aṭanga rawn lar a ni a, 'The Marvelous Mrs Maisel'-ah a chang tawh bawk.