Queen of Rock ‘n’ Roll Tina Turner a fam ta

Dynamic rock leh soul singer hmingthang tak ṭhin, Queen of Rock 'n' Roll tih hming lem an pek hial, Tina Turner chu kum 83 mi niin Nilaini zan khan a chenna Küsnacht, Switzerland-ah a thi. Turner hi cancer, stroke leh kal ṭha lo natna avangin a taksa lamah harsatna hrang hrangte pawh a lo tawk tawh ṭhin a ni.

Anchhia kha hlawhtlinnaah

Tina hi rock 'n' roll lar ṭan chhoh lai, 1950's bawrah a zai hmangin a eizawnna bul a ṭan chho a, hun rei lote chhungin 'Proud Mary', 'River Deep', 'Mountain High' hla hmangin mipui mimir hriat a hlawh.

Tina hi a vanglai chuan live performer ṭha ber pawl a ni ṭhin a, mipui hip theihna danglam tak nei mi niin stage-a a chevel a hmuhnawm ṭhin hle.

Ike Turner-a'n an band Kings of Rhythm-ah zai turin kum 17 mi chauh a nih laiin a lalut a, Turner nen hian an innei zui bawk.

Ike hi a nupui chungah lal a hrawt ṭhin avang leh, a nunrawn ṭhin em avangin khatihlaia a chenna Dallas chu cent 36 chauh nei chungin, kum 1978 khan a chhuahsan a ni. A pasal nen an inkar buaina chuan rimawi lama a kalkawng chu nasa taka a nghawng chhoh hnuah, eng kawngah pawh talent nei ṭhaa thawkrim na na na chuan thawh leh hun an nei ṭhin tih rawn nemnghetin, kum 1984 khan a multiplatinum album “Private Dancer” nen solo artist ropui tak ni turin a rawn 'comeback' leh a ni.

Hmeichhiate tana sulsutu

Turner hian rimawi lama chawimawina sang Grammy Awards pariat a dawng tawh a, kum 1991 khan a pasal hlui Ike nen Rock 'n' Roll Hall of Fame-ah lakluh niin; 2021 khan solo artist anga lakluh leh a ni. Mihang hmeichhiate tana sulsutu pawimawh tak niin Beyoncé, Janet Jackson, Janelle Monae leh Rihanna-te pawhin an rimawi zinkawnga mi pawimawh tiin Turner hi an dahsang hle.

Tina Turner thih thu hian khawvel a deng chhuak chak hle a, milar tam tak - supermodel Naomi Campbell, Basketball legend Magic Johnson, singer Kelly Rowland, Ciara, The Rolling Stones frontman Sir Mick Jagger, Sir Elton John, U.S. President Joe Biden leh Bryan Adams-te pawhin an ui thu hi an tarlang a ni.

Mi bik chu

Tina Turner thih thu hi a chhungte chuan a official IG page aṭangin an puang a, "Tunah hian khawvel chuan music legend leh role model a chan ta," tiin thlahna thu an ziak. Tina hian a hringnuna a rilru natna leh a tawrhnate chu a aw tham, chak tak si hmangin hla thumal tinte chu kan tawn ni ve ang maiin a rawn sa chhuak thei a, Queen of Rock 'n' Roll tih hming lem an pek pawh hi a phu hliah hliah. Kum 1988-a Rio de Janeiro-a concert-ah phei chuan mipui 1,80,000 chuang zet kalkhawmin tun thlenga concert neih tawh azawnga ropui ber pawl leh, ni reng tawh tur a hnutchhiah.

Tina hringnun zinkawng tarlanna, kum 1993-a biopic tihchhuah 'What's Love Got To Do With It' khan Oscar nomination lai a hmu phak a ni.

"Mi hian ka hringnun hi harsa viau turah an ngai a, mahse zinkawng duhawm leh nuam tak a ni. Kan upat poh leh eng thil nge thleng tih aiah, eng tin nge in hmachhawn tih kan hrechiang ṭhin," tiin nun duhawm tak hmangtu a nih zia hahipin a sawi.

A pasal hmasa Ike nen an inṭhen hnuah German music executive Erwin Bac nen 1980's bawrah intawngin, kum 2013 khan an innei a, Switezerland-ah an khawsa zui a ni.