FBI-in YouTuber Jake Paul in an dap

Federal Bureau of Investigation (FBI)-te chuan Nilaini khan American YouTuber Jake Paul in an dap a, silai eng emaw zat an man niin BBC chuan a tarlang.

FBI thupuangtu chuan FBI swat team ralthuam kengte chuan Paul in hi an dap tih sawiin hetihlai hian Paul hi a inah a awm lo. Official-te chuan eng nge an dap chhuah an tarlang duh lo a, an thil chhui kalzelah inkungkaihna nei nia an hriat vangin an dap a nih hmel. BBC chuan swat team-te chuan silai eng emaw zat an lakhawm lai hmuh a nih thu a tarlang.

Arizona-a thil suasam thubuai pawh lo nei tawh Paul hian tunhnaiah khan public health order a bawhchhe bawk. .Paul hi khawvela YouTuber lar ber pawl a ni a, kum 23 chauh la ni mah se follower maktaduai 20 chuang a nei. YouTube-ah hian stunt, prank leh a khawsak dan vel a tilang ṭhin a, tunhnai lawk khan music video pawh a tichhuak nghe nghe. Application tihtawp tawh Vine hmanga lar chhuak a ni a,  Disney Channel series Bizaardvark-ah pawh season hnih a inlan bawk. A unaupa Logan Paul pawh YouTuber tho a ni a, a ni ai mahin follower a ngah zawk a ni.