Kanye-a'n US President inthlan chuh a tum lo

Kanye West chu nakkuma neih tur United States President inthlan chuhna aṭangin a inhnukdawk niin khawthlang media te chuan an tarlang.

Report thar berin a tarlan danin, Ye hian a chhungkua leh ama private Christian school Donda Academy enkawl kawngah rilru sawrbing a tum zawk tih an sawi. Ye a thawhpui hnai tak pakhat chuan, "A fate, chhungkua, Donda Academy leh a nupui thar bak ngaihtuah dang a nei lo a ni," tiin a sawi

Ye hian January thlaa Yezzy-a a thawhpui Bianca Censori nen a ruka an inneih hnuah thuneihna sang chelh chakna chu a paihthla vek tih an sawi. Hei bakah, Donda Academy-a zirtirtu hlui pahnihin chi inthliarna, dan dik lo taka inban tir leh, thutlukna mak tak tak avangin April 5 khan Los Angeles County Superior Court-ah school leh Ye chungahte hian thubuai an thehlut a ni.

Thubuai thehluttu, zirtutu Cecilia leh Chekarey-te hi mihang niin, Donda Academy-a an inenkawl dan chu nasa taka sawiselin, paycheck ruak emaw hlawh kim lo emawa pawisa an dawn ṭhin thu te, inchhaihnawmnahna (bullying) nasa tak an ngaihthah mai ṭhinte leh, "hriselna, bawlhhlawh sawngbawl dan mumal lo, naupang himna leh tualchhung leh state dan," chungchanga dan bawhchhiatna te chu ngaih pawimawh sak an nih ngai loh avangin he thubuia hi an thehlut ta tih an sawi.