Femina Miss India 2023 - Nandini Gupta
India rama beauty pegeant ngaihhlut ber, Femina Miss India vawi 59-na chu Inrinni zan khan Khuman Lampak, Imphal, Manipur-ah a hmawr bawk a ni ta a, Rajasthan nula, Nandini Gupta chu Femina Miss India World 2023 ah thlan a ni a, Miss World 2024-ah India ai a awh zui bawk ang.
Delhi nula, Shreya Poonja chu pahnihnaa niin, hmarchhak aṭangin Manipur nula Thounaojam Strela Luwang chu pathumna a ni.
Miss India, i belchiang ang hmiang
Kum 19 mi, Nandini hi engineering leh medical aspirants-te tana coaching hub lian ber zinga mi, Rajasthan a khawpui pakhat Kota-a piang leh seilian a ni. A hmelṭhat piah lamah a thluak a ṭha tel hle. Business Management-ah degree neiin, "Ka hlawhtlin theihnan theihtawp chhuah ṭhin mi ka ni," tiin businessman and philanthropist Ratan Tata chu thilpek leh midang tana a luanchhuahna kawng a phurna petu a nih thu leh, Miss World (2000) Priyanka Chopra chu entertainment industry lama ka entawn ber a ni, a ti.
Granfd finale-ah hian milar pawh an fuankhawm ṭha hle a, kum kalta lama pakhatna lo ni tawhte hmel pawh hmuh tur an awm nual.
Kumina Beauty pageant-ah hian state 29 (Delhi chhiar telin) leh Union Territory aiawh pakhat aṭanga a ṭha thlankhawmte chuan grooming session hrang hrang an paltlang a, Manipur-a hmun hmingthang tak takah photoshoot neihpui an ni.
Kumina Miss India endiktu atan hian Femina Miss India Universe 2002 leh mentor ni bawk Neha Dhupia, Indian boxing lama mi hrang Laishram Sarita Devi, choreographer lar Terence Lewis, filmmaker leh writer Harshavardhan Kulkarni leh designer chhuanvawr Rocky Star bakah Namrata Joshipura-te'n endik hna hi an thawk a ni.
Hmasawnna tam tak ka chhar belh - Zuali Chhangte
Mizoram aiawhtu, Miss India Mizoram Zuali chu inelnaah hian a vanduai lamah ṭang mah se, hlawkna tam tak a chhar belh tih Vanglaini a hrilh. "Ka thil thlir dan zawng zawng min thlak tir a, hmasawn tura tel ka ni a, mi zinga awm dan tam tak ka zirbelh bawk. State hrang hrang aṭanga kalkhawm kan nihna angin, ram khata awm si, kan lo danglam zia ka hriat belh bawk a ni"tiin a sawi.
Ṭawngah harsatna i tawk em? -"Ṭawngah hian harsatna ka tawk deuh ber. Hmarchhak state aiawha tel ṭhinte pawh hi India ram khawpui, Delhi leh Bangalore vela chengte an nih avangin hmarchhakah hian an khawsa ngai lo a, Hindi hi an ṭawng theih lutuk loh pawhin an hrethiam tal ṭhin, keichuan harsatna ka tawh phah . Hei hian ka nih tur ang ka thlen theih loh phahin ka hria. Miss Gujarat, Simran Sani nen hian harsatna kan tawk deuh ber, mi dang chuan Hindi hi an hrethiam tlangpui," a ti.
Zuali hian naktuk hian Miss Mizoram 2016 Rody H Vanlalhriatpuii leh Miss Gujarat te nen Mizoram an rawn pan dawn a ni.