Leonardo leh Maya Jama te'n hun hlimawm tak hmang

Leonardo DiCaprio leh a kawppui nia an sawi, TV presenter Maya Jama chu hun hlimawm tak hmangin khawthlang ram hrang hrangah an inzui kual.

Titanic actor leh, U.K. reality TV show lar tak "Love Island" host-te hian New York, London leh Paris-ahte hun an hmang dun niin an sawi a, long-term relationship hmang zo ve ve an nih avangin an inkar thuhlaah erawh hmanhmawh an tum lem lo a, eng nge an thlen zel dawn tih thlithlai pahin hun hlimawm tak an hmang tih khawthlang media-te chuan an tarlang.

Kum 47 mi lemchanthiam hi nikuma Camila Morrone nen an inṭhen hnuah supermodel Gigi nen pawh sawi zawm an ni hman a, mahse hei erawh thawnthu hlui mai a ni ta. Kawppui tur zawn kawnga pachhe lo tak Leo leh Maya-te hi February thlaa BAFTA Film Awards-ah khan an inzui a, March thlaah New York khawpuiah hmuh dun ni lehin, hemi thlaah vek hian Le Piaf club, Paris-ah hun an hman dun leh avangin an inkar hi a thuk tawh hle niin an sawi.

Maya pawh hi dating khawvelah a mikhual lo hle. Rapper Stormzy nen kum li an inzui hnuah kum 2019 khan an inṭhen a, hemi hnuah NBA player Ben Simmons nen inzui lehin, inhual hman hial mah se, nikum khan an inṭhen ve leh a ni.