Drake 'Rescue Me' hlaa Kim K lan danin sawi zui a hlawh

Canadian rapper, Drake chuan a single thar preview rawn neiin, hetah hian Kim Kardashian-i'n a pasal hlui Kanye West a ṭhen dawna a ṭawngkam hman a zehtel avangin boruak a rawn nei lian lehpek hle.

March 31-a The Fry Yiy Show episode 100-na puala an kawmnaah, Drake chuan a single thar thlirlawkna rawn neiin, "Hei leh chen hi ka lo kal tawh a, hlimna tawng lo turin hei leh chen ka lo kal lo. Hei hi hre reng rawh," ti'a Kim Kardashian-i'n a sawina chu a hlathuah hian zeptel a ni. Helaia an thu lakchhuah hi kum 2021-a "Keeping Up with the Kardashians" season hnuhnung ber aṭanga lakchhuah niin, Kim chuan a nu, Kris Jenner hnenah a pasal Kanye ṭhen a duh thu a sawina a ni.

"Rescue Me" tih hla hi Drake-a'n kumtluana hun a hmanpui tur hmeichhia a zawnna leh, hmeichhe fiam a bansanna lam hla a ni bawk.

Drake leh Kanye-te hian kum kalta khan inhmuhthiam lohna neuh neuh nei ṭhin mah se, kum 2021 khan "Free Larry Hoover" benefit concert-te nei dun lehin, an inkar hi an chingfel thawkhat tawh niin an ngai.

September 2022 khan, Kanye leh Adidas inṭhen chungchangah Drake chuan demna thu a lo chhakchhuak hmanhmawh leh bawk a, a thawhpui Nike chu chungnung zawkah ngaiin kum 50 an tlin lawmpuina a hlan nghal bawk a ni.

"Thil kalhmang diktak in hriat chuan Adidas chuan Kanye an nei a ni deuh mai a," a ti a, "Nike chuan LeBron James, Kevin Durant, Giannis Antetokounmpo, Michael Jordan, famta Virgil Abloh. Cristiano Ronaldo kan nei. Serena Williams leh, Tiger Woods thlengin kan kawl vek a ni," tiin, "Reebok chuan Tyga an nei thung a, chuvang chuan kan ṭha e," tiin Rapper ṭawngduh ve tak Drake chuan a thawhpui Nike elpui dangte chu a kaplet zui a ni.