'Dungeons And Dragons'-in John Wick a tukdawl

Fantasy heist action comedy film, "Dungeons & Dragons: Honor Among Thieves" chuan Keanu Reeves channa "John Wick : Chapter 4" paihthlain North America box office chung berah a rawn inhlang kai.

John Wick tukdawl turin a ṭha tawk

Chris Pine leh Michelle Rodriguez channa, Dungeons & Dragons hian tlangzarh karah USD mtd 38.5 lalutin, kar hmasa lama box office champion John Wick tukdawl turin a ṭha tawk tih a rawn lantir.

Review ṭha tak dawng a, fakna awka ṭhahnem tak a dawn hnuah he film budget sang ve angreng tak hi beisei lawk angin a rawn che ṭha hle a, khawvel huap market 58 aṭangin USD mtd 33 lalut bawkin, a sum lakluh belhkhawm chu USD mtd 71.5 lai a tling der tawh.

"Dungeons & Dragons" hian review a hmuh ṭhat piah lamah, entute aṭangin A- cinemascore a hmu phak a, a che chhe lo. Mahse, he film siamna atan hian USD mtd 150 chuang zet an hman avangin tunkar chhoah a chetṭhat hi a chhawmzel erawh a la ngai dawn tihna a ni.

Pathumnaah 'His Son Only'

Bible behchhan drama film "His Son Only" hi Genesis bung 22 aṭanga lakchhuah niin, David Helling kutchhuak a ni a, Pathianin Abrahama hnena a fapa Isaka halral thilhlana pe tura Moria tlanga a tirh dan chanchin tarlanna niin, kar liam ta chhung khan USD mtd 5.5 thawkchhuakin pathumnaah a rawn inhlangkai.

Kar hmasa lama pakhatna, 'John Wick : Chapter 4' chu franchise record siama USD mtd 73.5 zet a hailuh hnuah, pahnihnaah a tlakhniam a ṭul ta a, entu hi 62% vel zetin tlahniam mah se, USD mtd 28.2 vel lai la thawkchhuak pha thoin, a sum lakluh belhkhawm hi USD mtd 123 a tling tawh a ni.

Thawm nei lian tura ngaih Super Mario Movie

Kar leh lawka tlangzarh tur leh, kumin film chhuak tur zinga hlawhtling ber turte zinga mi tam takin an ngaih "The Super Mario Bros. Movie" chuan boruak a nei lian tawh hle. Kum 15 kal ta chhung khan toys leh a bikin video games-te hi franchise film hlawhtling tak rawn ni chhoin; sum lakluh kawngah pawh a ber zinga chhiar tel theih khawpin a lo hlawhtling tawh ṭhin a ni.