Lewis Capaldi A album pahnihna tur hla a phuah zo tawh

Scottish singer 2020 Brit Award for Song of the Year dawngtu Lewis Capaldi chuan a album pahnihnaa mi tur hla a phuah zo tawh tih a sawi.

A fan-te'n an zawhna chhangin Lewis Capaldi chuan a album thar turah chuan hla 11 a dah tawh tih sawiin, nakkum lamah chuan tlangzarh hman a inbeisei. A album tihchhuah hmasa ber a hlawhtlin em avangin a album pahnihna tur avang chuan a zam ve hle tih a sawi bawk.

Capaldi hi kum 23 chiah la niin album pakhat chiah la tlangzarh mah se a hlawhtling tawh hle. Nikuma a album tihchhuah 'Divinely Uninspired to a Hellish Extent' kha larpui nghal hle a, UK leh Ireland-ah No.1 nihpuiin, heng ram pahnihah hian nikum chhung khan album hralh chak ber a ni hial.

Rimawi khawvelah sulhnu la ngah lutuk lo mah se award ngaihhlut tak tak a dawng der tawh a ni.