Lzzy Hale-in Covid-19 la thutak lote dem

19th May, 2020

Halestorm frontwoman Lzzy Hale chuan hripui leng mek Covid-19 la thutak lote chu a dem thu a sawi.

Hale chuan Pathianni khan an rama state ṭhenkhat chu zalen leh ṭan tawh mah se a la inkhung hrang dawn tih sawiin, music thar a buaipui chhunzawm dawn tih a sawi a ni.

"Ka hun tam zawk, 90% chu tour-naah ka hmang a, mahse tunah chuan chu chu a theih tawh lo. Ka crew-te'n an tuar a, hmalam hun kan hre lo bawk a, band in hriat tam tak leh in ngainat tam takte chuan an tuar zo lo ang. Chuvang chuan in thei a nih chuan, smart takin awm ru. A ṭul fe a nih loh chuan pawnah chhuak lo ula, in chhuak a ngai a nih pawhin hmai tuam ula, uluk takin in kut sil ru. He thil nuaibo tur hian ṭangrual ang u!" tiin a sawi.

Damdawi awm si loa state ṭhenkhat an inthlahdul chu hlauhthawnawm a tih thu a sawi bawk.

Kar liam ta khan Halestorm hian #ROADIESTRONG support campaign puangin khawvel puma live music buatsaihtu road crew-te ṭanpuina turin hma an la a ni.

#ROADIESTRONG support campaign hnuaiah hian fan-te chuan #ROADIESTRONG merchandise an lei theih bakah ṭanpuina an thawh thei a, heta ṭanga an sum hmuh chhuahte hi Live Nation Crew Nation hnenah an pe ang.

Halestorm hian album thar tihchhuah an tum a, EP pahnih khat tihchhuah lailawk an tum thu chu sawiin hei bak hi chu thuchiang engmah an la sawi lo a ni.