Marvel Cinematic Universe-ah X-Men?

Marvel 'insider' pakhat Avengers: Endgame leh Marvel Phase Four chung­changa lo sawi lawk tawhtu chuan X-Men-in Marvel Cinematic Universe-ah X-Men an inlan dawn thu a sawi leh ta tlat mai.

Twitter-a Roger Wardell tih hminga account neitu chuan MCU-ah Fantastic Four leh X-Men-te kan hmu dawn tih sawiin, an khawvel Earth-1610 counterpart beh­chhanin an inlan dawn tih a tarlang. Role pawimawhah John Krasinski leh Giancarlo Esposito-te chu an chang dawn a, Ultimatum erawh MCU-ah an tel dawn lo a ni, a ti.

Roger Wardell hian a hmain Avengers: Endgame chungchang a lo sawi dik nual tawh a, Thor-a thau tur thu te, Captain America ‘Hail Hydra’ chungchang leh Stan Lee cameo 1970's-a a awm dawn thute thengin a sawi dik a, Robert Redford leh Frank Grillo inlan tur chungchangte pawh a sawi dik bawk. Tunhnai lawkah khan Black Widow-ah Florence Pugh-in Yelena Belova lem a chan dawn thu leh Eternals-a Richard Madden inlan tur thute pawh a sawi lawk dik tawh a ni.

Tweet a siam tharah hian Marvel chuan multiverse strategy lam a hawi dawn niin a sawi.

Fantastic Four film siam thar leh turah Reed Richards lema chang tur hian Krasinsk hming sawi rikin a lo awm tawh a, amah ngei pawhin March thla khan a chan hreh loh thu a lo sawi tawh. Chumi a nih avang chuan Roger Wardell hian a sawi dik leh mai thei a ni.