Taylor Swift-i'n ropui takin Eras Tour a khuhhawng

Kum nga chhung tour nei thei loa a awm hnuah, Taylor Swift chuan Inrinni khan ropui takin Eras Tour a khuhhawng.

Kum 33 mi, Swift hi tour a neih loh avang hian a awm mai mai tihna erawh a ni hauh lo. Kum nga liam ta chhung khan album pali tichhuak hmanin, heng zingah hian 'Folklore' album chu Grammy a lakpui hman a ni.

Covid-19 hripui leng vanga tour a neih theih loh vang nge, Swift hian kum 2019-a tihchhuah "Lover" album zinga mi "Miss Americana and the Heartbreak Prince" hmangin show hi a khuhhawn hnuah darkar thum vel zet a perform. A music career-a hla chi hrang hrang 44 zet a sa hman a, zaithiam nazawng tan tihtheih a ni lo a, hei hian Swift aw leh taksa fit zia a tilang tel bawk.

Swift chuan Eras Tour hi "ka rimawi zinkawng tarlanna" tiin a lo sawi lawk tawh a, a studio album 10-na Midnights a tichhuak leh bawk nen tour ticket zuarchhuaktu, Ticketmaster system pawh a chhiat phah hial a nih kha. Hetichung hian, artist zingah ni khata ticket hralh chhuak hnem ber record siamin, mtd 2.4 zet a hralh hman a ni.

Arizona-a, State Farm Stadium-a tour hawnna hi mi 80,000 chuangin an chhim a, United States-ah tour date 52 ruahman hmasak phawt a ni a, khawvel ram hrang hrang a hrut kual dawn em tih erawh official-a puanzar a la awm hrih lo a ni.