Instagram lalnu thar Selena-i'n followers mtd 400 nei tling ta!

Selena Gomez chuan IG-ah mellung pawimawh tak siamin, hmeichhia zingah khawvela social media platform hman tlanglawn ber pawl, Instagram lamah followers maktaduai 400 chuang nei hmasa ber a ni ta!

Thla hmasa khan Kylie Jenner lallukhum chu laksakin Instagram-a hmeichhe follower ngah ber nihna hi a lo chelh tawh a, hei hian boruak a rawn nei nghal hat a, Kylie-i'n Selena nuihsawh zawnga post a siam avang leh Hailey Bieber nen inhmuhthiam lohna an neih avangin IG lalnu ni ṭhin, Kylie hian followers maktaduai khat chuang a hloh phah tawh a ni.

Hailey Bieber leh a ṭhianhnai tak–Kylie leh Kendall-te'n social media post leh TikTok video hmanga Selena an troll-na ni thei awma ngaih theih post an siam zui avangin dem an hlawh phah hle. Hei hi mi tam tak chuan social media aṭanga Selena inthiarfihlim chhanah an ngaih phah a ni.

Mahse boruak rit tak kara dingchang zawk erawh Selena hi a tih theih a, Selenators (Selena fans sawina) inhrosa zet chu dan rual an ni lo.

Selena Gomez hi hmeichhia zingah IG-a followers mtd 400 nei hmasa ber leh awmchhun a ni mek. Selena hi social media lamah a tal tam ve hle a, filter tel loa a thlalak pholan ṭhinte chuan lawm pawh a hlawh ṭhin hle a nih kha. Hei bakah hian Hailey drama vang hian lainattu a ngah sawt a tih theih a, hei hi followers an pun hluai nachhan pawh a ni.

Selena hian football legend Cristiano Ronaldo (mtd 562) leh Lionel Messi (mtd 442) te chiah phak loin, followers neih tam lamah pathumnaah a awm mek a ni.