Taylor Swift-in live track a tlangzarh

Taylor Swift chuan a album thar ber 'Lover' a hla awmte live-a a sakna a tlangzarh.

Hripui leng vanga a  'Lover Fest Tour' neih tur ṭhulh ta kum 30 mi Swift hian a fan-te lunghnur lutuk tur khawngaihin Pathianni khan ABC-ah  'City of Lover' concert special tichhuak­­in, hemi hnu hian a hla live version-te hi stream theih turin a chhawp chhuak nghal.

'City of Lover' concert a tihchhuah hi nikum September-a L'Olympia Theater, Paris, France-a a neih kha a ni.

Taylor Swift hian nikum August 23 khan 'Lover' album hi a tlangzarh a, a hit nghal hle a, tlangzarh a nih karah hian Billboard 200 chart-ah No.1 a ni nghal a,  Australia, Canada, Mexico, Netherlands, New Zealand, Spain leh UK-ahte No.1 a ni bawk.

Kum 2019 chhunga studio album hralh chhuak hnem ber a ni a, kumin January thla thleng khan khawvel pumah copy maktaduai 3.2 a hralh a ni.

A studio album pasa­rihna 'Lover'-ah hian track 18 lai a dah a, single pali a tichhuak tawh bawk. Kumin chhunga 'Lover Fest Tour' neih a tum erawh loh theih loha a ṭhulh a ngai ta si a, amah pawhin pawi a tih thu a sawi tawh a ni.