MPS Chapchar Kût Lady atan Zarkawt nula Tina Vanlalhruaii

Mizo Photographers' Society (MPS) Chapchar Kut Lady thar atan Tina Vanlalhruaii, Zarkawt Veng, Aizawl thlan a ni a, March 14, 2023 zan khan MPS Chapchar Kut Lady ni lai Vanlalhmangaihzuali, Zemabawk North hnen aṭangin MPS Chapchar Kut Lady nihna a la chhawng a ni.

MPS Chapchar Kut Lady result hi Thawhlehni zan khan Cultural Centre, Vaivakawn-ah puan a ni a. Aizawl Mayor Lalrinenga Sailo chuan he hun hi a hmanpui.

MPS hian kum 2021 leh 2022-ahte COVID-19 hripui leng avanga Chapchar Kut Lady an thlan theih loh hnuah, kuminah erawh nunphung pangngai takin Chapchar Kût hi lawm a nih leh thei ta a, Kut Lady pawh thlan a ni leh ta a ni. Chapchar Kut Lady 2023 atan Tina Vanlalhruaii, Zarkawt Veng, Aizawl thlan niin, 1st runner-up chu Lalṭhazuali, Tuivamit Veng, Aizawl a ni a, Vanlalbeiseii, Venghnuai chu 2nd runner-up a ni thung.

MPS hian kum 2013 aṭang khan Chapchar Kut Lady hi an thlang ṭan a, Sarah Lalnunsangi chu MPS Chapchar Kut Lady hmasaber a ni. Aizawla Chapchar kut lawmnaa tel, Mizo nula, Zo thuam inbel te aṭangin a duh apiangin nomination an siam thei a ni.

Mizo Photographers's Scociety Facebook group-ah Chapchar Kut ni aṭangin nominee atana an duh chu post in, hengte hi thlitfim chhoh hret hret an ni a, group member ten like hmanga vote an pek theihna te pawh ruahman ṭhin a ni bawk.