Nicole Kidman vanga Oscars-a inlan lo Tom Cruise

Tom Cruise channa "Top Gun: Maverick" chu Oscars-ah nomination paruk zet hmuin actor pawh hi award sem zana inlan ngei tura beisei ni mah se, a kawppui hlui Nicole Kidman a kal ve avangin kal loh a thlang ta zawk niin khawthlang media te chuan an tarlang.

Kum 60 mi lemchanthiam chuan kum 20 liam taa a nupui hlui nena intawn leh chu a huphurh ru hle tih an sawi. Hetih lai hian, Tom Cruise lamhnaite erawh chuan mimal thil vanga kal lo ni loin, a hnathawhna lam vang zawk niin an sawi thung.

Tom leh Nicole-te hi December 24, 1990 khan inneiin, fa pahnih Isabella leh Connor-te an adopt a ni. Cruise chuan February 2001 khan Nicole nen an inṭhenna lehkha a thehlut a, khatih hunlai khan Nicole chu a ṭhawng hle a ni.

An inṭhen chungchanga Vanity Fair-in an kawmnaah, "Nicole hian kan inṭhen chhan a hria a, keipawhin ka hria. Ka fate tan nu a ni a, ṭha takin awm zel se ka ti. Hringnunah hian thil tam tak a thleng a, kawng engkimah theihtawp han chhuah ṭhin mah ila, eng tik hunah emaw chuan thil nihna dik tak hi kan hmachhawn a ngai ṭhin a ni," tiin Cruise chuan a sawi.

Nicole nen an inṭhen hnuah, Cruise hi lemchanthiam vek Katie Holmes nen November 18, 2006 khan innei lehin, fanu Suri an nei a, August 2012 khan an inkar hi an chhuchat leh a ni. Hetihlaiin, Nicole erawh country singer Keith Urban nen tun thleng hian nupa kawpchawi hlim tak an la ni zel a ni.