Billboard "Greatest Rappers Of All Time" Jay Z; Kendrick Lamar, Nas, Tupac Shakur, Eminem te'n an dawt
Hip Hop din ṭan aṭanga kum 50-na tlincham pualin, Billboard leh Vibe chuan rap khawvela mi bikte an thlangchhuak a, kum 30 chhung zet hip hop khawvela lo tal tawh Jay Z chu rapper ṭha berah an thlang. Rap music hi New York khawpuiah kum 1970 chho aṭanga khan an rawn ching chhuak ṭan a, Bronx-a African American zingah a tla na fal hle. Hei hi tun thlenga nghawng a neih len chhan pakhat niin, rapper ṭha hming kan lamchhuah dawn apiangin mihang an tel tlangpui ṭhin. Hip hop hi khawvel changkan chhoh ang zelin ṭhuang hniha ṭhen a ni a, "Old school hip hop" leh "New school hip hop" a awm a, rimawi kalhmang pawh inan lohna chen thui tak a awm tawh bawk.
Mi bik Shawn Corey Carter-a chu
American rapper, record producer, entrepreneur, leh entertainment agency Roc Nation dintu kum 53 mi Jay Z; a hming tak Shawn Corey Carter hi Hip Hop music chawi kangtu leh sulsutu pawimawh tak niin, Kanye West, Rihanna, leh J. Cole rawn lar chhohna kawnga tha thawhtu mi pawimawh a ni. Sumdawnna hrang hrang luhchilhin hip hop artist zinga billionaire hmasa ber a ni bawk.
Kum 1980 aṭangin a rimawi zinkawng hi zawh ṭanin, kum 1995 khan record label Roc-A-Fella Records chu a din a, solo studio album 13 a tichhuak tawh. Record maktaduai 140 chuang zet hralhchhuak tawhin, Jay-Z hian rimawi lama chawimawina sang ber Grammy Awards vawi 24 lai a dawng tawh a, rapper zingah hetiang ang zat la thei dang awmchhun chu Kanye West chauh a ni.
Jay Z hi Songwriters Hall of Fame leh Rock and Roll Hall of Fame-a rapper lakluh hmasak ber a ni a, kum 2013 khan Times Magazine chuan 100 most influential people in the world ah an lo thlang tawh bawk.
2. Kendrick Lamar : Pahnihnaah hian khawtlang veina lam hawi zawnga hla thu rawn chhamchhuak ṭhin, Kendrick Lamar awmin tun generation-a hip hop artist huhang ngah ber pawl a ni.
Compton rapper hian record copy mtd 70 chuang hralhchhuak tawhin, Grammy 17, Primetime Emmy Award, American Music Awards, Billboard Music Awards, MTV Video Music Awards a hui kim vek tawh.
3. Nas : Jazz musician Olu Dara fapa, Nasir bin Olu Dara Jones hian kum 1989 khan a musical career a ṭan. A album hmasa ber Illmatic (1994) hi tam tak chuan hip hop album chhuak tawha ṭha berah an chhal.
A studio album 12-na King's Disease (2020) chu "Best Rap Album"-ah thlan niin a vawi khatnan Grammys a lakpui. Nas hian kum 1994 aṭang khan studio albums 15 a tichhuak tawh a, chung zinga 10 chuan certified, platinum, multi-platinum an dawng tawh a ni.
4. Tupac Shakur : Tupac Amaru Shakur hi rapper piang tawh azawnga thawm nei lian berah mi tam tak chuan an ngai. Khawvel huapah music record mtd 75 chuang a hralhchhuak tawh a, mihring intluktlanna leh khawtlanga suahsualna leh kalsual lai zep nei loa auchhuak pui ṭhin a ni.
Kum 2017 khan Rock and Roll Hall of Fame-ah lakluh a ni a, Rolling Stone chuan Shakur hi 100 Greatest Artists of All Time huangah a telh bawk a ni. September 7, 1996 khan Las Vegas-ah lirtheia a chuang lai chu a taksaah vawi li kah niin, a hnu ni ruk September 13, 1996 khan a hliam tuar loin a thi. A thih hian kum 25 mi chauh ni mah se, hip hop artist zinga sulhnu nei ngah ber pawl a ni hman.
5. Eminem : Marshall Bruce Mathers III hi middle America lama hip hop chawikangtu niin, mi ngo rapper piang tawh azawnga thiam bera ngaih a ni. Eminem hian record mtd 220 chuang hralhchhuak tawhin, musical genre hrang hranga artist hlawhtling ber zinga mi a ni.
Billboard chuan "Artist of the Decade (2000–2009)" ah a lo puang tawh a, Recovery (2010) kha kum 2010-a album hralh hnem ber a ni bawk. Rimawi lam chawimawina chu a dawng kim thawkhat tawh a, November 2022 khan Rock and Roll Hall of Fame-ah lakluh a ni.
Billboard’s Top 10 Greatest Rappers of All Time:
1. JAY-Z
2. Kendrick Lamar
3. Nas
4. Tupac Shakur
5. Eminem
6. The Notorious B.I.G.
7. Lil Wayne
8. Drake
9. Snoop Dogg
10. Nicki Minaj