Jimin leh Taeyang-in hla thar tichhuak dawn

K-pop lama mi hrâng pahnih, Taeyang (Big Bang) leh Jimin (BTS)-te chuan karleh hian single thar "Vibe" an tichhuak dawn.

Black Label thuchhuah tarlan danin, January 13 hian K-pop legend pahnihten hla thar an tichhuak dawn tih sawiin, Thawhlehni khan an single official poster pawh mipui hmuh theihin an lo phochhuak tawh a nih kha.

"Vibe" hi kum 2017-a a tihchhuah "White Night" hnua Taeyang-a solo hmasa ber tur a ni dawn a, chu aia mipui ngaihven zawk erawh BTS-in mimal ṭheuha rimawi lam buaipui tura chawlhlailawk an puan hnuah Jimin-a official solo hmasa ber tur a ni dawn a ni. Jimin hi nikum lama BTS-in chawlh an puan hnuah an member zinga solo project tichhuak hnuhnung ber a ni.

Thla hmasa lawk khan RM chuan a official solo debut album "Indigo" chu a tlangzarh a, Jungkook chuan a hla hit "Dreamers" chu tichhuakin, Spotify-ah phei chuan stream mtd 100 chuang a nei der tawh a, mimala an kal hran pawhin hlawhtlinnain a la um chho zel rih a ni.

Hetih lai hian, kum 27 mi Jimin chuan a hmain solo single, “Lie,” “Filter,” “Promise,” “With You,” Krismas hla thar “Christmas Love” leh hla dang ṭhahnem tak a lo tichhuak tawh bawk.