Quavo-a'n Takeoff thlahna hla 'Without You' tlangzarh

Quavo chuan thla hnih liam taa an kahhlum, a vahpa leh Migos bandmate, Takeoff hriatrengna atan hla thar "Without You" a tichhuak.

He hlaah hian kum 31 mi, Quavo chuan kum liam ta zawng zawnga hun chhinchhiah tlak bik an hman chhoh dan te leh, a tel loa hringnun hman a harsat dawn ziate a tarlang.

"I tel lo chuan Krismas pawh a nuam famkim ta lo, vanah kan inhmu dawn nia," tiin Takeoff thlahna thu a chhamchhuak.

Quavo hi November 1-a Takeoff an kahhlum ṭum khan 810 Billiards & Bowling Houston, Texas-ah khan a kiangah a awm ve a, a hmuna hmutu tlemte zinga mi niin kha mi nia a unaupa chunga pawikhawihna thleng kha theihnghilh harsa a la tih reng thu IG kaltlangte pawhin a lo tarlang tawh bawk a ni.

Takeoff thattua puh USD mtd 1-in chhuah lailawk

Takeoff thattua nia puh, Patrick Xavier Clark chu USD mtd 1 hu inremna hmangin a zalenna a nei let rih niin court thuchhuah chuan a tarlang.

Kum 33 mi Xavier hi promoter lar tak a nih bakah, strip club leh khawthlang ram lama social media-a mi hmingthang tak a ni. Eng inremna nge an ziah erawh tarlan a ni lo thung.

Patrick hi 810 Billiards and Bowling-ah dice an khelh laiin intihthiam lohna thlenga buaina chawk chhuaktu zingah a tel nia puh a ni. Takeoff thah a nih aṭanga thla khat hnu, December 1 khan man a ni a, tualthah thubuai siamsak nghal a ni.