Mizo Idol Hmangaihi'n a hla hmasa ber a tichhuak ta

Mizo Idol Season 7 Winner Hmangaihi chuan Mizo Idol intihsiakna zawh hnua a single hmasa ber ‘Friendzone’ chu a tichhuak.

Darbu Music App-ah release niin darkar 24 chhungin Rs. 10,000 chuang a hlawh hman a ni. A hla thupui aṭang hian a hla awmzia tur chu a hriat ruak theihin a rinawm. Tunlai ṭhalai ṭawngkam ‘Friendzone’ tih chu kan ngaihzawn leh vei ruk em em te'n min ngaizawng let ve lem lo a; ṭhian anga min en sawinan hman a ni.

A hla kalhmang

He hla hian mi friendzone a awm nat zia leh tih theih a van zia a rawn sawi chiang hle. He hla hi Mizo Songwriter/Musician kan la hriat lar em em loh RaxaR phuah a ni.

A career a kalpui zel tum dan leh a Genre thlana chiang em em, Hmangaihi chuan Neo Soul (tunlai Music Genre lar tak, Soul leh Contemporary RnB in a rawn hrinchhuah) lam a rawn hawi leh ta chat mai. He genre in a mamawh em em, hmeichhe aw ngaihnobei leh zun nei, a huna sang taka invawrh thei si chu Hmangaihi hian a sak chi tak a nihzia a rawn phochhuak chiang hle. He hla a guitar works mawi tak hi Ngura, Khatla perh niin, a music production zawng zawng hi Lord’s Audiocraft- JH Vanlalngheta (Mangheta) kutchhuak a ni. He hla hi Darbu Music App lamah Rs. 15 in lei theih a ni. Amah duhsaktu mi ṭhahnem takin a man zat aia toin an leisak nasa hle bawk.