Avatar 2 senso a hautak; Hlawkna tel turin USD tld 2 tal lakluh ngai

Kumin film chhuak tawh leh la chhuak tur zinga mipui ngaihven hlawh ber zinga mi, 'Avatar: The Way of Water' chu a production man a san em avangin, director James Cameron chuan hlawkna tel tur chuan USD tluklehdingawn 2 tal an lakluh a ngai dawn tih a sawi.

GQ magazine-in an kawmnaah, Cameron chuan film-a an senso zat chu chiang takin tarlang lo mah se, USD mtd 350 - mtd 450 inkar vel a niin report chuan a sawi a, film aṭanga sum lakluh tlakhniam dan chhutin Disney leh 20th Century Studios tan budget sang film siam a huphurhawm thu a tarlang bawk.

Cameron chuan 'Avatar: The Way of Water' aṭanga hlawkna hmu turin khawvela film sum lakluh tam lamah pathumna emaw palina emaw tal a nih phak a ngai, a ti.

Avatar film hmasa kum 2009-a tihchhuah kha film aṭanga sum hailut hnem ber niin, USD tld 2.92 vel a lalut tawh. Avatar film pahnihna hi theatre-ah December 16-a tlangzarh tura tih a ni.

Film sum lalut tam zualte :
1. Avatar - USD tld 2.92
2. Avengers: Endgame - USD tld 2.7
3. Titanic - USD tld 2.1
4. Star Wars: The Force Awakens - USD tld 2.07
5. Avengers: Infinity War - USD tld 2.05