A hun a hnai, Aizawlah MLTR an lo thleng ta!

Zirtawpni zana AR Ground, Lammuala inlan tur Michael Learns to Rock (MLTR)-te chuan nimin khan Aizawl leilung an rawn rap ta. 'BACK ON THE ROAD' tour neiin India ram khawpui pasarihah leh Asia ram hmun hrang hrangah concert an nei dawn a. India rama an tour kick-off nan Aizawl an hman dawn avangin a phurawm lehzual hle.

MLTR hi kum 1988 khan Denmark ramah indin in, kum 1991 khan an album hmasa ber ‘Michael Learns to Rock' an release a, copy maktaduai 11 lai hralh tawhin, download ringawt pawh maktaduai 6 a tling phak. Online stream tluklehdingawn 1 chuang zet an nei tawh bawk.

An music hi soft rock, pop leh ballad inchawhpawlh a ni. Mizote bengfah zawng tak mai music a lo ni kher bawk nen, an vanglai chuan Zofate zingah tuipui lo an awm lovang tih theih hial a ni. A hmei a pa, a pui a pang in an hla lar ho hi chu ṭhian zaho pawha sak rual dual dual a kan zawm theih vek anih vangin Aizawlah ngei mai an rawn chetla tur hi a nghahhlelhawm takzet a ni.

An hla hit ‘25 minutes’, ‘That’s why you go away’, 'The actor’, ‘Paint my love’, ‘Out of the blue’, ‘Take me to your heart’, ‘Sleeping child’, leh an hla lar dangte chu ‘live’ ngeia ngaithlaa lo sukpui dual dual turin insan mar a hun chho ta viau e.

Sound lamah hian India hmarchhak state a sound nei ṭha ber te zing ami, International band Smokie, Mr.Big, Firehouse, Bryan Adams, Scorpions, Eric Martin, leh a dang tam tak lo setup sak tawh tu, Delta Sound lamin an hmanraw neih ṭhat ber an rawn chhawp chhuak dawn a. MLTR ngaihthlak nan duhthusama sound ṭha a awm dawn a, mit leh beng a tlai hle ang. Ticket hi Uncle's, MZU, Luna’s, Khatla, Memei’s Mobile Dawr, Bawngkawn, Shop At Judy’s, Ramhlun North, Filler, Mission Veng, MS Variety Store, Opposite PUC, Chawngthu Sports, Dawrpui, Hillside By Moitei, Zarkawt-ah te lei theih a ni.

MLTR concert Physical leh online kaltlanga ticket lei te chuan Fork and Spoon, ITI; Lalrin's Bistro, Sikulpuikawn; Streetfood Asia, Dawrpui; Medhavi Foundation, Bawngkawn leh Free Bird, Vaivakawnahte Zirtawpni thleng QR code hmanga tihnun tur a ni. Ticket tinung tawhte hi wristband pek zel an ni dawn a, wristband tel lo hian AR Lammualah luh a remchang dawn lo niin Alpha Omega chuan Vanglaini a hrilh.