Fiamthu hmanga Zoram mipui min awi hlim ṭhintu, YK Solar LPS Comedian Search 2022 chu Zirtawpni liam ta zan khan neih zawh a ni ta a, H. Lalremsanga Chhingchhip Venghlun chu pakhatna a ni. Lawmman pakhatna hian pawisa fai Rs nuai 1 bakah, Suzuki Access 125, TV, Solar Water Heater 100ltr leh trophy a dawng. 
Pahnihnaah hian Bethlehem veng tlangval, Reuben Lalhruaitluanga niin, pawisa fai Rs 50,000 bakah Refrigerator, Trophy leh Homelighting Solar Hybrid Set a dawng a. Pathumna hi Vanlalfakzuala Sailo, Zonuam niin pawisa fai Rs 30,000 bakah, Washing Machine, Trophy leh Homelighting Solar Hybrid Set nen a haw bawk. Top 5-a inhlangkai Zothansanga, Rawpuichhip leh Pachuau Lalenkawla, West Lungdar-te'n Rs 5,000 ve ve an dawng a, hei bakah kumina contestant-te hian mi thilphalte hnen aṭangin thilpek ṭhahnem tak an dawng bawk a ni. 
Kumina fiamthu intihsiak endiktute hi Lalhruaitluanga Chawngte, H. Rotluanga leh Harry Khiangte-te an ni a, round hrang hrangah guest judge-ten an ṭawiawm bawk a, intihsiak chhung zawngin an thutluknaah sawisel tur a vangin fak pawh an phu hle. 
Comedian Search chief organser H. Rotluanga (Mapuia) chuan an show ngaihlutu hnenah lawmthu sawiin, "Kum 14 lai mai show kan kalpui ve ta. Pathian malsawmna liau liau a ni a. Zoram mipuite leh fiamthu thiamte min ṭawiawmna leh support avang hian kan lawm tak zet a ni...season 15 awm leh ngei turin hma lak leh pawh kan tum e," tiin Vanglaini a hrilh.