Praise on 2022 ; 'Kristian hla bu zan' intihsiakna zawh fel a ni

Praise on 2022 final round zan khatna, 'Kristian hla bu zan' chu Thawhlehni zan khan Mission Veng Presbyterian Kohhran Golden Jubilee Hall-ah neih a ni a, top 10 te'n beng an titlai lehpek hle.

Final round hi zan hnih neih tur a ni a, a zan khatnaah hian top 10 te'n Kristian Hlabu ami an hla duh ber an sa a, intihsiakna stage a san tawh angin hla thlan pawh an uluk a, an zai a ngaihnawm tlang bawk.

Chanmari West Hmar Veng branch chhuanvawr, Isaac Lalthazuala'n top 10 intihsiakna khuh hawngin Krismas hla, Kristian Hlabu 124-na, 'Aw zan thianghlim' tih a sa a, head voice a hman thiam zia a rawn lantir leh a, an zinga Krismas hla lam hawi sa awm chhun a ni.

Lunglei Lunglawn nula, Jessica Lalhmangaihtluangi'n Kristian Hlabu 193 na ' Ka nunna lal ka khumtir che' tih hla a rawn sa ve thung a, a aw danglam mawi tak nen a in mil hle a, judge te pawhin zai ṭha an ti tlang hle.

Tlangnuam West branch KṬP member Malsawmdawngzuali'n Kristian Hlabu 203 na 'A saw raltiang tlangah' tih hla rawn sa in, a aw pui zia a rawn lan tir leh a, hall chhungah kut beng thawm a ring ṭha hle.

'Gospel Rocker' tia an koh fiam, R. Remsangpuia'n Kristian hla bu 259 na, 'Khawvel hrut chhuak ila' tih hla sa in, a rawn rock pui hle a, a aw lian tak nena in rem mil tawk turin arrangement a bei mawi fu.

Aw thunun hneh, aw thlep kual vel thiam, Rengdil tlangval R. Lalmuanpuia'n Kristian hlabu 415 na ' Hriat chianna hlu ber' tih hla a sa a, a aw tláwk mawi tak mai chu Judge te fakna a ni.

Ṭhazual gospel Top 10-ah pakhatna lo hauh tawh, Fall Profane band vocalist Vesper Lalrinawma'n Kristian hla bu 433-na 'Ka chhandamtu min vengin a hnai reng' tih hla sa in, live music-a zai ṭhang tih takah sound track a hlasak aiin nuam a ti hle tih a lang a, a zai ah a lang bawk a ni.

Laipuitlang nula, R. Lalnuntluangi'n a ṭhiante hla thlan loh lam, khawhar hla kan tih zinga mi, Kristian hla bu 489-na 'Van hmun ropui hmangaih ram khi' tih hla a sa a, khawhar hla thluk pawl, country type-in a sa a, lung a kuaiin, a aw dam tak nen a hla thlan hi a inmil hle a ni.

Kolasib Diakkawn nula, Lalhriatkimi'n Kristian hla bu 165-na 'I sual rit phur tihbona i duh em' tih hla a sa a, musician tih takah arrangement a mawi a, zai a thiam zia a rawn lan tir bakah a aw sik sawi kual vel pawhin thlirtute beng a fah teh e.

Aw puitling, a aw in mi tam tak a lo koh ṭhin angin Durtlang nula Lalramnunmawii'n Kristian hla bu 292-na 'Chhandamtu nung rawng ka bawl' tih hla a rawn sa a, a aw thleh mawi kual thiam zia a rawn pho lang leh.

Aw mawi danglam tak nei, Gloria Laldinsangi'n Kristian hla bu 259-na 'Khawvel hrut chhuak ila' rawn sa in, hall chhunga mite a ṭhap ṭha hle.

Final round zan hnihna hi November 17 zanah an nei leh dawn a, November 18 zanah result puan a ni ang. Praise on 2022-a pakhatnaa hian Rs. 1,00,000 a dawng anga, Pahnihna in Rs. 50,000; Pathumna in Rs. 30,000 leh Top Ten tling chin ten Consolation Prize Rs. 7,000 ṭheuh an dawng dawn a ni.