Praise On 2022 Top 10 bihchianna
September 26, 2022 aṭanga neih ṭan Branch KṬP malzai intihsiakna chu a hmawr bawk chho ṭanin, final round chu November 8 leh 17, 2022-ah Mission Vengthlang Presbyterian Kohhran Golden Jubilee Hall-ah neih a ni dawn a. Top 10 te inelna zai hi live music hmangin house band-ten an rem ang.
Top 20-a inhlangkai zingah hmeichhia an tam zawk a, intihsiakna hautak zawk hmachhawn tura tling zingah pawh hmeichhia an la tam zawk. Mi 10 zinga mi 4 te chu Aizawl khawpui pawn lam mi niin, midang 6 te hi Aizawl khawpui chhung branch 6 aiawhte an ni thung.
Praise on 2022 finalist te chu :
1. Lalramnunmawii
Durtlang nula 'Mawitei' hi tun ṭum hi zaia inelnaa a tel vawikhatna a ni chungin, rimawi khawvelah erawh a mikhual lo. Durtlang pastor bial zaipawl member ni lai, aw control thiam tak, judge ten 'I zai puitling' an tih ṭhin a ni. Elimination round-ah Kristian Hlabu ami 'Zual zelin ka fak chak hle che' tih chu R&B lam rawngkaiin a sa a, intihsiakna sang zawkah soul lam a uar chho ta thung. A aw control kual velin ngainat leh thiam tih a hlawh a, judge Mavuana pawhin, "I zai hi, i aw in min ko an tih tur ang chi hi a ni," a ti hial.
2. Lalhriatkimi
Musical instrument khawih thiam deuh vek 'Kimkimi' hi Kolasib Diakkawn nula a ni a, Aizawl-ah college kalin a awm mek thung. Second round-ah 'Ka beisei Isua' tih hla sa in, keyboard hmangin a zai a rem a, mipui ngaihven a hlawh phah hle. Kum 5 mi a nih aṭangin mipui hmaah a zai ṭan a, sunday sikul aṭanga bulṭanin branch KṬP programme hrang hrangah zai chho zelin, kum 2013-a CZS Kolasib-in solo competition a buatsaihah khan pahnihna a ni.
3. R. Lalnuntluangi
Top 10 zinga naupang fál, Tluang Tluangi hi Laipuitlang, Aizawla cheng niin, kum 5 mi a nih aṭangin sunday sikul-ah a zai ṭan a, tun ṭum hi zai inelnaa a tel vawikhatna a ni. A aw mil tur hla a thlang thiam hle a, elimination round aṭanga top 20 round inkarah genre hrang hrang hrut kualin, jazz lam a inhmeh zual bik emaw tih tur a ni.
4. R. Lalmuanpuia
Rengdil tlangval Muanpuia hi 'Aw thunun hneh, aw thlep kual vel thiam' tia judge te fak ṭhin a ni. LPS vision production-in kum 2019-a 'Youth Icon' an buatsaihah khan top 50 thleng a inhlangkai. Tun ṭumah hian Top 20 round-ah khan Lalruatfeli (Mapuii) hla phuah leh sak lar 'Trinity' sa in, a thiam hle a; judge te pawhin a hla sak chu an huphurhpui aia a sak ṭhat thu an sawi chhuak hial. R&B lam a thiamnal bik deuha ngaih ni mah se, genre dang hymn, country leh soul lam pawh a thiam em em tho bawk.
5. Malsawmdawngzuali
Tlangnuam West branch KṬP member Mali hi Praise On-ah hian mikhual a ni lo, kum 2016-ah khan a lo tel tawh. "Aw pui taka zai hem hem chi" tia judge te fak Mali hian top 20 round-ah khan Kristian Hlabu 132 na 'Enge ka rilru a mangan' tih hla a sa a, judge te lung a dum hle a nih kha. Judge zing ami Zothanmawia'n 'I zai a ngaihnawm, Isua pawh a lawm ka ring," tiin a fak hial. Beginners department zirlai a nih aṭangin mipui hmaah a zai ṭan a, Zoram mipuiin a zai kan la ngainat chhoh zel a rinawm.
6. Gloria Laldinsangi
Intihsiakna neih a niha Gloria-i a rawn lanin thawm a awm hak zel, an branch ten an ṭawiawm ṭha a; a zai ngainatu an tam. Dawrpui Vengthar nula Gloria hi zai intihsiaknaah tun ṭum hi a vawikhat telna a ni. Judge ten "Nang hi chu 'Artist' i ni" an tih hian lem ziah a tui a, rimawi hmanrua Guitar leh Keyboard a tum thiam bawk. Gloria hi a aw a danglam a, aw tlanglawn lo tak mai nei a ni.
7. Jessica Lalhmangaihtluangi
Mizoram chhim lam aṭanga Praise On 2022 top 10-a inhlangkai awmchhun, Jessica-i hi Lunglawn, Lunglei-a cheng niin, Lunglei Chanmari pastor bial zaipawl member nilai a ni. 'A zai nung' tia sawi ṭhin niin, judge zinga mi Stacy-i'n "I zaiah hian tinungtu a awm tlat ṭhin, min ti kang tlat zel," tiin a comment hial. Top 20 round-ah khan 'No longer a slave to fear' tih hla Mizo ṭawnga lehlin a sa a, a aw danglam mawi tak nen a hla thlan hi a inhmeh hle. Round a san chhoh zel angin a zai pawh a ṭha chho telh telh a, hmasawn berte zinga mi a ni.
8. Isaac Lalṭhazuala
Chanmari West Hmar Veng tlangval 'Saka' hi Chanmari West pastor bial zaipawl member ni lai niin, tenor part a sa. Top 20 round-ah khan 'Joyful Joyful we adore thee' tih hla Mizo ṭawnga lehlin a sa a, a zai zawha judge ten an sawizuinaah Stacy-i'n intihsiaknaa tel ve dang te aia a danglamna hrilhin, "Soul hran i nei a, chu chu midang laka i danglamna," a ti. Saka hi music man tak a ni a, head voice a hmang thiamin, a ngaihnawm ṭhin hle.
9. R. Remsangpuia
'Gospel Rocker' tia koh fiam, Chanmari West Branch KṬP aiawha rawn tel Rsp-a hi Mizorama band contest ngaihhlut hlawh takah te pawh lo tel tawhin, an Band hian pakhatna dinhmun hial te pawh an lo luah tawh. Rimawi khawvelah mikhual a ni lo. Mipa aw lian ṭha tak, zai hluah hluah ṭhin a ni. A zaithiam piahlamah a stage perfomance chu judge te duh rawn chhan a ni. Band angin lo zai fo tawh ṭhin mah se, mal zaia inelna erawh a la hmachhawn tam lo thung.
10. Vesper Lalrinawma
KṬP Saitual branch-a bial zaipawl member ni lai, Vesper-a hi Gospel band ṭha tak 'Fall Profane' vocalist a ni. Top 20 round-ah khan Israel-a Pachuau hla 'Krista tan' tih hla a sa a, a ngaihnawm teh e. 'Gospel Rocker' tia sawi theih tho Vesper-a hi a aw a danglam a, judge ten comment an pek pawhin 'a aw danglamna' an sawi chhuak ṭhin, Stacy-i chuan, "I aw i sawizawi hneh lutuk hian min hneh," tiin a fak hial.