Zaninah Lallianmawia Pachuau pual hun hmang dawn

DDK Aizawl, Zonun Band leh Delta Sound ṭangkawp chuan 'Zo Awi Zunzam'-ah Mizo hla phuah thiam leh zaithiam Lallianmawia Pachuau pual hun an hmang dawn. DDK-ah zanin dar 7:00 aṭangin live telecast a ni ang a, Doordarshan Aizawl Youtube channel-ah live stream-a pekchhuah a ni bawk ang.

Lallianmawia Pachuau puala hun buatsaihah hian zaithiam - R.Lalruatkima, Vanlalduhawma (Kawrthindenga), K.Lalthlamuankimi leh Israel Lalbiakrema-te an zai dawn. Anni bakah Lallianmawia fapa, Zaithantluanga pawh a zai dawn a ni.

Lallianmawia Pachuau hi a thih khan kum 24 mi lek ni mah se hla a phuah thiam bakah a zaithiam em avangin uitu leh ngainatute an tam a, Lallianmawia Pachuau Memorial Society (LMS) pawh an din phah a ni.

Tu nge Mawitea?
Lallianmawia Pachuau hi October 2, 1963 khan Bawrai khuaah PC Rokunga leh Saimanliani Jongte te nupa inkaraah a lo piang a, unau 10 niin a naupang ber dawttu a ni.

Mawitea pain an unaua upa ber dawttu chu ṭingṭang a lei sak a, a u awm loh hlanin perh a lo zir ve ṭhin. Kum sarih mi a nihin hla lar tluangtlam ho chu a perh rem thiam hle tawh. Middle school aṭanga an soloist a nihna chu high school-ah pawh a chhawm chho zel a. High School a kal lai, kum 1979 khan a hla phuah hmasak ber 'Mangṭha di te' tih chu a phuah nghe nghe a ni. PU a zir lai pawhin college thil tihah zai tura ruat a ni ta ziah bawk. Kum 1982 Mizo Zaimi Inzawmkhawm (MZI)-in Lammuala Mizoram pum huap Beat Contest a buatsaih ṭumin Lokicherra hmingin a zai a, mipa ziathiam berah an thlang. Zaithiam vangin certificate leh Rs 200 lawmman a dawng.

A huang a zauh
Kum 1983 kum tirah All India Radio-ah 'aw' a khung a, chumi ṭum chuan hla paruk khungin a hlate chuan thlan a hlawh chho viau. AIR-ah hian a vaiin hla 40 chuang a khung hman.

A hla-in hriat a hlawh chhoh hnuah Aizawl Radio House neitu, Pu Thangluaia puihnain anmahni studio phuahchawp - LZ Recording studio-ah kum 1984 khan zai album an siam a. He album-ah hian zaithiam lar chho ve mek H.Lalrinkimi nen "Fam chan hma chuan" tih hla an sa dun a ni.

Zai Album hi pali a siam hman a, a hnuhnung ber 'Duat lai Ate' hi kum 1986 kum tawp lam, a thih hma khan an zo fel hman. A album hmasa ber tih loh, a dang pathum hi Otto Recording studio-ah a record a, a hla te hi a lar ṭhin bawk a, cassette pawh hralh a kal ṭhin hle.

November 23, 1986 Makedonia chanchinbua 'Mi danglam' tih sermon a chhiar aṭangin a nun a lo danglam a, Peniel Biak In, Hnahthial-ah testimony sawi tur leh zai turin an sawm nghal a. Hemi ṭum hian a hla phuah "Aman engkimah min hria" tih a sa a, hei hi mipui hriata a sak chhuah hmasak ber a ni a, a pianthar hnua mipui hmaa a hun hman hmasak ber a ni bawk. A pianthar aṭanga a thih thlengin lengzem hla a sak hriat a ni ta lo.

May 17 zan khan Upper Khatla-ah an mu tur chu tui dehnaah chesualin a thlang kawngpuiah a tla thla a, Aizawl Civil Hospital-ah tlan pheipui nghal a ni. A hliam a nat êm avangin a tuk May 18, 1987 zan 8:45-ah Zoram deng chhuak zaithiam, Lallianmawia Pachuau chuan he khawvel a khualzinna ram chu kum 23 leh thla 7 mi chauh niin a chhuahsan ta a ni.