Swift-in ‘Bejeweled’ MV tichhuak Cinderella thawnthu min hrilh

Taylor Swift chuan a studio album 10-na 'Midnights' aṭanga music video pahnihna “Bejeweled” chu puanlawk ang ngeiin nimin khan a tichhuak. He music video ziaktu leh direct-tu chu Swift vek hi niin Oscar winner Laura Dern, bakah HAIM, Jack Antonoff, Dita Von Teese, leh Pat McGrath-te hmel pawh kan hmu a ni.

MV-ah hian Swift chu chhiahhlawh lemah ṭangin, a hun tamzawk chu an chenna tihfainan a hmang ṭhin. HAIM unaute leh an nu hrawn Laura Dern-te chuan an diriamin an hmusit thei hle. Lalnu Pat McGrath chuan ball-cum-talent-show buatsaihin pakhatnain an lal fapa bakah castle-an dawng thei dawn tih a hriat veleh fairy godmother, Dita VonTeese ṭanpuina in intihsiaknaah hian a tela, pakhatna a ni zui ta a ni.

'Midnights' hian chart record awmsate chu a rawn khum chho zel a, US bikah tlangzarh ni khan copy 8,00,000 chuang an hralh hem mai. Kum 2017-a Reputation album hnua hralh tla ber niin, kumina album hralhchhuah hnem ber leh karkhata vinyl album sales lamah record thar a siam bawk a ni.