Francis-a hla thar 'A na em a ni'

'Thinlung khawngaih-thlak' hitmaker Francis-a chuan nizan khan hla thar 'A na em a ni' a tichhuak a, a official YouTube channel lamah ngaithlak theih turin lyric video a dah chhuak a ni.

'A na em a ni' hi ama phuah niin karhla di neih hrehawm zia a rawn sa chhuak a ni ber mai. A instagram lamah pawh Nilaini khan a hla thar tur teaser hi a dah chhuak a, comment aṭang pawhin ngaithla chak an tam tih a lang chiang.

Recording hi West End Studio neitupa Tluanga Hnamte nena an buaipui niin hmanrua pawh an hmang dangdai hle a, kuhva pack-na sarang pawh thler ri thlengin an hmang tih Francis-a chuan Vanglaini a hrilh a, Tluanga Hnamte bula recording tih hi nuam a ti hle nghe nghe.

Francis-a hla tharah hian David-a, Ramhlun chuan guitar perh sak niin, Tluanga Hnamte ho hian an pathum hian inkhung hrangin hla an phuah ṭhin a, kumin chhung hian hla thar 12 tal chu phuah hman an tum a ni. Tunah hian music video pawh an buaipui mek a, shooting nei mekin retro lam hawi a ni dawn tih Francis-a chuan a sawi a, Francis-a zai ngainatute tan chuan a nghahhlehawm hle ang.