Hmangaihi'n a hla a sak chungchangah Jt Production-a'n eng nge a sawi?

Mizo Idol 2022 T Vanlalhmangaihi khan Mizo Idol competition chhung khan tunlai lengzem singer zinga lawm hlawh ber pawl Jt Production hla a sa ṭhin a, a sa mawi thei hle.

Chumi chungchangah chuan Jt Production chuan Vanglaini zawhna chhangin,"Khang ka hlate kha Darbu-ah bak dah a ni loa, Hmangaihi khan min promote sak a ni ber a, a lawmawm khawp mai. Keini hla ve tehlul intihsiakna lianah a lo sa a, ka tan chuan a lawmawm," tiin a sawi.

Hmangaihi hian Jt-a hla hi intihsiak chhung khan a sa zeuh zeuh a, 'I tan (Ka ṭhen thei lo che)' phei chu a sa mawi rem rem hle a, top 3-a a rawn sak leh phei kha chuan rawn sa mawi zualin mi ṭhenkhat chuan pakhatna a nih chhanah pawh an ngai hial a ni.

An thawkdun dawn em?
Mizo Idol intihsiakna neih chhung khan endiktu lam khan Hmangaihi leh Jt-a hming hi an sawizawm zeuh a, chumi chungchang chu Vanglaini chuan Hmangaihi leh Jt-a zawt chiangin tun dinhmunah chuan thuchiang a la awm loh thu an sawi ve ve.

Hmangaihi chuan engmah inbiakna an la neih zui rih loh thu a sawi a, Jt-a pawhin tun dinhmunah chuan hmalakna engmah a la awm rih loh thu leh hmalam hun tur erawh a sawi lawk theih rih loh thu a sawi bawk. Engtikah emaw chuan an la thawkdun mai thei asin!

Mizo Idol top 10 contestant ṭhenkhat hi tunah hian Mizo Idol 2022 pathumna David Lalchawisanga Darlong ṭawiawmin Tripura lamah an zin mek a, Hmangaihi pawh hi Davida ṭawiawmtu zingah hian a tel a ni.