Olivia Wilde film 'Don't Worry Darling'-in sum a lalut tam ber

North America Box Office-a sum lalut tam ber chu Olivia Wilde film siam 'Don't Worry Darling' niin $19,353,213 lai a lalut.

'Don't Worry Darling' hi kar tawp liam ta chhung khan US-a theatre 4,113-ah chhuah a ni a, $mtd 19 chuang lalutin ram dang aṭangin $10,900,000 lai a lalut tawh bawk a, a sum hmuh chhuah tawh zawng zawng chu $30,253,213 a ni. He film hi $mtd 30 vel senga an siam a ni a, an budget hi an hmu chhuak thuai dawn tih a chiang.

A changtute an ṭha a, director Olivia Wilde hi inlan ve bawkin Florence Pugh chu achangtunu ber a ni a, Wilde bialpa Harry Styles chu achangtupa a ni bawk. Chumi a nih avang chuan he film hian tlangzarh a nih hma pawhin thawm a nei hat tawh a nih kha. Anni bakah hian Gemma Chan, KiKi Layne, Nick Kroll leh Chris Pine-te pawh he film-ah hian an chang a ni.

Phychological thriller film niin he film chungchangah hian film review-tute ngaihdan a inchen lo viau. Florence Pugh chevel an fak a, cinematography leh production design pawh an fak angreng hle, chutih rualin a script, direction leh Styles chevel erawh mi ṭhenkhat chuan an sawisel thung. Rotten Tomatoes lamah pawh rating a hmu ṭha lua lo a, 5.4/10 a hmu a ni.

Top 10-ah film thar dang lang a awm lo
Box Office top 10-ah 'Don't Worry Darling' lo chu film thar dang a awm lo. Chutihrual erawh chuan Avatar film kha theatre-ah an chhuah thar leh a, top 3-ah rawn inhlangkai lehin, $10,529,576 lai sum lalutin kar hmasaa pakhatna 'The Woman King' kha pahnihna a ni thung a, $11,004,516 lai sum a lalut leh a ni.

Film thar, film thar
Cuando Sea Joven (17), Railway Children (18), On the Come Up (22), Give Me Five (34), Buried: The 1982 Alpine Meadows Avalanche (36) leh My Imaginary Country (46)-te chu film thar Box Office Mojo chart-a lang an ni.