Zorinzuali Khiangte ft G'nie 'Ka Saltanna' a chhuak dawn

Zorinzuali Khiangte kan hria, a zai thiamzia pawh kan hria. Mizo rapper ṭha ber zinga mi G'nie nen thawkdunin hla thar 'Ka Saltanna' music video an tichhuak dawn.

'Ka Saltanna' hi a nep thei lo. A chhan chu maw, Jt Production leh G'nie phuah dun a ni miau a, ngaihthlak a manhla dawn tih a chiang. A hla thluk erawh Jt-a siam a ni thung. Mizo rimawi khawvela sulhnu ṭha tak tak hnutchhiah tawhtute thawkho kut chhuak hi a chhe thei lo.

Music siam saktute pawh an hrawl. Guitarist chu Jona niin Bruce Pachuau chu bassist a ni thung a, drummer chu Eric Chenkual niin keys-ah Makima a ni thung. Anni kut chhuak hi a ngaihthlak tlak dawn tih a chiang bawk. Zai leh rap mai bakah a music pawh a mawi tel dawn tihna a nih chu.

Kings & Prophets-ah recording an ti a, Wardrobe chu CC couture/ Buanga chhangte niin MUA chu Jbo_simiex a ni thung.

Zorinzuali hian music video thar a tichhuak lo rei deuh tawh a, tuna a rawn tichhuak leh tur hi a nghahhlelhawm hle. G'nie erawh hi chuan tunhnai khan Kimkima thawhpuiin music video a tichhuak thung a, ni li liam ta vel khan YouTube-ah dah chhuakin thlirtu nuai hnih chuang an awm leh der tawh a ni.

'Ka Saltanna' hi Zonet lamah leh YouTube lamah thlira ngaihthlak tur a awm thuai dawn a ni.