Jeon Somi-in Interscope Records thawhpui

K-pop star Jeon Somi tia hriat lar, Ennik Somi Douma leh Interscope Records chuan thawkdun turin inremna an ziak.

Tunhnai kum eng emaw zat chu khawvelah K-pop thlipui a tleh a, Blackpink lamin YouTube lamah record an siam chho deuh mawlh mawlh bawk nen, American record label Interscope Records hian K-pop artist-te lam a hawi ṭan niin a lang. Hei vang hian Somi pawh hi an thawhpui dawn ta a nih hmel. Somi-in a thawhpui mek The Black Label leh Interscope Records-te chu Somi zaina tur chungchangah hian an thawk dun dawn a, kum 19 mi Somi hian Interscope Records leh Universal Music Group a represent tawh thung ang.

Somi hi hmeichhe band member 11 awmna Ideal of Idol (I.O.I) band-ah a tel ṭhin a, mahse a hnuah solo-in a kalhrang a ni. Kum 2019 June 13 khan a single 'Birthday' chu a tichhuak a, hetaṭang hian mi hriat a hlawh zual hle. He hla hian YouTube lamah tlirtu maktaduai 78 chuang a nei der tawh. Kum 2001 March 9 khan Canada-a Ontario khuaah a piang a, a pa hi Matthew Douma (Dutch) a ni a, a nu hi Jeon Sun-hee (SKorea) a ni thung. Kum 1 a nihin Canada aṭang hian a nute khua SKorea-ah an pem a, taekwondo black belt '3rd dan' lai a ni.